Google sön dövrlərdə qarşılaşdığı məhdudiyyətlərlə gündəmdən düşmür. Belə ki, ABŞ məhkəməsi tərəfindən haqsız rəqabət ilə günahlandırılan Google şirkətinin daha bir sirri ortaya çıxdı. Bu gün məlum olub ki, Google standart axtarış sistemi olmaq üçün Apple şirkətinə milyardlarla dollar ödəyir. Bildiyimiz kimi, Google və Apple arasında uzunmüddətdir ki, müqavilə bağlanıb. Bu müqavilə isə Google axtarış sisteminin iPhone və digər Apple modellərində əsas axtarış sistemi olması ilə bağlıdır. Lakin indi ortaya çıxıb ki, Google bu müqaviləni davam etdirə bilmək üçün Apple şirkətinə milyardlarla dollar ödəyir.
Xatırladaq ki, 2021-ci ildə Bernstein analitik firması, Google şirkətinin standart axtarış sistemi məsələsi ilə bağlı Apple-a ildə 10 milyard dollar ödədiyini bildirmişdi. Yeni hesabata görə isə bu məbləğ əslində 2-3 dəfə çoxdur. İddiaya görə Google iPhone və digər Apple modellərindəki, istifadəçilərini əldən çıxarmamaq üçün Apple şirkətinə ildə 18-20 milyard dollar ödəyir. Bu sövdələşmənin isə Apple üçün illik əməliyyat mənfəəti 14-16%-dir. Google isə ümumi reklam gəlirlərinin təxminən 5-də birini məhz Apple şirkətinə xərcləyir. Onu da qeyd edək ki, Apple şirkəti reklam gəlirlərindən də pay alır. Hətta analitiklərə görə texnologiya nəhəngi 40% reklam gəlirini əldə edir.
Ötən ay Microsoft şirkətinin Bing axtarış sistemini Apple-a satmağı düşündüyü məlum olmuşdu. Əgər bu addım başa çatsaydı Bing, Apple cihazlarında standart axtarış sistemi olacaqdı və Google axtarış sistemini əvəzləyəcəkdi. Həmçinin mütəxəssislərə görə Google, artıq yolun sonuna gəlib. Məhkəmə böyük ehtimalla Google və Apple arasındakı bu sövdələşməyə xitam verəcək. Lakin yenə də, bu qərarın verilməsi 2024-cü ildən tez olmayacaq.
