Google, tərtibatçılar və korporativ istifadəçilər üçün əsas dil modeli Gemini-nin yeni versiyası olan Gemini 1.5-i təqdim edib. İnternet nəhəngi, Gemini 1.5 ilə böyük irəliləyiş əldə etdiyini bildirir. Ümumiyyətlə Google sadəcə 2 ay əvvəl Gemini süni intellekt modelini təqdim etməsinə baxmayaraq artıq bu sahədə ciddi irəliləyiş əldə edib.
Gemini Ultra ilə eyni səviyyədə olduğu deyilən 1.5 Pro-nu da hazırlayan Google, Gemini 1.5-in nəhəng bir kontekst pəncərəsinə sahib olduğunu, yəni çox daha böyük sorğuları emal edə və eyni anda daha çox məlumata baxa biləcəyini bildirir. Qeyd edək ki, yeni süni intellekti modeli OpenAI-nin GPT-4 üçün 128,000 və hazırkı Gemini Pro üçün 32,000 ilə müqayisədə 1 milyon tokendə kontekst pəncərələri təklif edir. Daha aydın desək, bir sorğu ilə 700.000-dən çox söz, bir saat video, 11 saat audio və 30.000-dən çox kodu anlayıb cavab verə bilir. Google CEO-su Sundar Pichai bildirir ki, Google tədqiqatçıları 10 milyon token kontekst pəncərəsini sınaqdan keçiriblər. Bu, bütün Game of Thrones seriyasını bir anda sorğulamağa bərabərdir.
Hələlik Gemini 1.5 yalnız Google-un Vertex AI və AI Studio vasitəsilə kommersiya istifadəçiləri və tərtibatçıları üçün əlçatan olacaq. O, daha sonra Gemini 1.0-ı əvəz edəcək. Habelə Gemini Pro-nun gemini.google.com saytında ictimaiyyətə açıq olan standart versiyası 128.000 token kontekst pəncərəsi ilə Gemini 1.5 Pro olacaq. Google bildirir ki, 1 milyon token üçün əlavə ödəniş etmək lazım gələcək.
