Keçən həftə Android Authority Google Play Xidmətləri daxilində hazırlanmaqda olan “App Cast” adlı alət aşkar etmişdi. Kod sətirlərinə əsasən, bu alətin Google-un Android cihazlarına hesabınıza qoşulmuş digər cihazlardan tətbiqləri yayımlamağa imkan verəcəyi proqnozlaşdırılır. Bununla belə, görünür ki, Google-un App Cast üçün daha böyük planları var. Bu xüsusiyyət Android üçün hazırlanan yeni “Handoff” sisteminin bir hissəsi ola bilər. Ümumi olaraq desək, Google tezlikdə android cihazları bir-biri ilə sinxronlaşdırmaqla yeniliyə imza atacaq.
Biz artıq, Apple-dan Handoff sistemini bilirik. Bu funksiya ilə Apple istifadəçiləri iCloud hesabına qoşulmuş cihazlar arasında tapşırıqları bir cihazdan digərinə problemsiz ötürə bilərlər. Eynilə, Samsung-un qoşulmuş Galaxy cihazları arasında zənglərə cavab verməyi, faylları paylaşmağı və qulaqlıqları qoşmağı asanlaşdıran Proqram Davamlılığı funksiyası var. Google Play Xidmətlərinin 25.25.31 beta versiyasındakı kodlara əsasən, App Cast-in Android-in Handoff adlı çox cihaz sinxronizasiya sisteminə qoşulduğu anlaşılır.
Bu sistem, cihazlar arasında tətbiqlərə, mediaya və bildirişlərə girişi təmin etmək məqsədi daşıyır. O, həmçinin cihazlar arasında bildiriş sinxronizasiyasını dəstəkləyir. Bu, birdən çox cihazdan istifadə edən istifadəçilər üçün əsas problem olan hər bir cihazda eyni bildirişin silinməsi problemini aradan qaldıra bilər. Əvvəllər bildirişlərin sinxronizasiya xüsusiyyəti ilə bağlı göstərişlər var idi, lakin bu funksiyanın Pixel cihazları üçün eksklüziv olacağı və ya bütün Android istifadəçilərinə təklif ediləcəyi bəlli deyildi. İndi bu yeni kodların Google Play Xidmətlərinə gəlməsi ilə bu xüsusiyyətin bütün Android cihazlarına gəlmə ehtimalı artıb.
