Bildiyimiz kimi, Apple smartfonlarının təmiri mövzusunda çox həssasdır. Belə ki, texnologiya nəhəngi zəmanət müddəti dolana qədər müştəriləri üçün bütün dəstəyi göstərir. Hətta müştərilər öz iPhone modellərini təmirə göndərdikdə onları bəzən yenisi ilə belə əvəz edir. Məhz bu fürsətdən istifadə edən fırıldaqçılar da saxta iPhone modellərini təmirə göndərərək Apple şirkətindən orijinallarını əldə edib. Qeyd edək ki, 2 fırıldaqçı şirkətə nə az, nə çox 3 milyon dollar zərər verib.
ABŞ-da Çin vətəndaşı olduğu açıqlanan 2 şəxs poçt vasitəsi ilə Apple şirkətinə təmir üçün göndərdikləri saxta iPhone modelləri ilə milyonlarla dollar dəyərində orijinal smartfon əldə edib. Yekunda isə ifşa olunan və yaxalanan fırıldaqçıları indi 20 il həbs gözləyir. Qeyd edək ki, Haotian Sun və Pengfei Xue adlı bu iki şəxs Honq-Konqdan gətirdikləri saxta iPhone-ları müxtəlif saxtakarlıqlarla servisə göndəriblər. Hətta Çinli fırıldaqçılar bu prosesdə cihazların seriya nömrələrini dəyişərək fərqli şəxsiyyətlərə malik fərqli cihazları göndəriblər. İfşa olunduqdan sonra ortaya çıxıb ki, onlar 5000-ə yaxın cihazı bu üsulla orijinalı ilə əvəz edə biliblər.
İzlərini gizlətmək istəyən ikilinin onlara aid olmayan poçt ünvanlarından və ya saxta ünvanlardan da istifadə etdiyi bildirilir. ABŞ qanunlarına görə isə onların bu hərəkəti birbaşa olaraq cinayətdir. İstintaqı aparan ABŞ prokuror köməkçisi Kondi J. Kleinman və prokuror Ryan Dickey, bu ikin nəfərin törətdikləri cinayətləri və izlədikləri üsulu izah etdikdən sonra onlar üçün 20 il həbs cəzası istəyib. Xatırladaq ki, bundan əvvəl də San Diego şəhərində iki qardaş oxşar fırıldaqçılığa görə 41 ay müddətində həbs edilmişdi.
