Samsung, özünün istehsal etdiyi və artıq bir çox smartfon modellərindən istifadə etdiyi Exynos çipsetləri ilə bağlı xəbərdarlıq edib. Belə ki, Cənubi Koreyalı texnologiya nəhənginə görə, Exynos çipsetli Galaxy cihazlarında təhlükəsizlik boşluğu aşkar edilib.
Samsung istifadəçilərə Exynos çipsetləri olan müxtəlif Galaxy cihazlarına təsir edən ciddi boşluq barədə xəbərdarlıq edib. Daha çox “Galaxy S20” və “Galaxy Note 10” seriyası kimi köhnə smartfonları risk altında qoyan zəifliyin bir neçə həftədir araşdırıldığı bildirilir. Google təhlükəsizlik tədqiqatçıları tərəfindən aşkar edilən CVE-2024-44068 boşluğunun həssas istifadəçi məlumatlarını ələ keçirməyə imkan verdiyi bildirilir. Bundan əlavə, Google-un Təhdid Təhlili Qrupu (TAG) bildirir ki, bu zəiflik özünü Samsung əməliyyatı kimi gizlədərək aşkarlanmadan yayınıb.
Bəs bu problem hansı cihazlara təsir edir? Samsung-un açıqlamasına görə, təhlükəsizlik boşluğu aşkar edilən Exynos çipsetləri müvafiq olaraq Exynos 9820, Exynos 9825, Exynos 980, Exynos 990, Exynos 850 və Exynos W920-dir. Habelə, bu çipsetlərə sahib olan Galaxy S20, Galaxy Note 20, Galaxy S10, Galaxy Note 10 seriyası, Galaxy A21, Galaxy A51 və Galaxy A71 kimi smartfonların və Galaxy Watch 4, Galaxy Watch 5 və Galaxy Watch FE kimi daşına bilən cihazların risk altında olduğu bildirilir. Samsung hazırda zəifliyin aradan qaldırılması üzərində işləyir və təsirə məruz qalan cihazlar üçün təhlükəsizlik yeniləmələri tədricən buraxılmağa başlayıb. Şirkət istifadəçilərə təhlükəsizlik yeniləməsi quraşdırılana qədər naməlum mənbələrdən tətbiqləri quraşdırmaqdan çəkinməyi tövsiyə edir.
