Fortnite oyununun istehsalçısı Epic Games şirkətinin rəqəmsal hücuma məruz qaldəğı və şirkətdən təxminən 200GB həcmində məlumatın oğurlandığı bildirilib. Qeyd edək ki, məşhur Mogilevich adlı haker qrupu hücumu təsdiqləyib. Ümumiyyətlə son dövrlərdə xüsusilə MENA bölgəsi olan Türkiyə və Argentina kimi regionlardan olan istifadəçilər Epic Games platformasına yönəlmişdi. Steam platformasında valyutanın dəyişməsi və qiymət artımı minlərlə oyun həvəskarının Epic Games platformasına keçid etməsinə səbəb olmuşdu.
İndi isə bildirilir ki, Fortnite oyununun tərtibatçısı Epic Games, Mogilevich adından istifadə edən bir dəstə tərəfindən ransomware hücumuna məruz qalıb. Məlumatlara görə, Mogilevich adlı bu qrup Epic Games şirkətinin serverlərindən e-poçt, parollar, istifadəçi adları və ödəniş məlumatları kimi vacib məlumatlar daxil olmaqla təxminən 200GB həcmində məlumat oğurlayıb. Mogilevich oğurlanmış məlumatları qiymət göstərmədən darkwebdə satışa çıxarıb.
Hackedilmiş məlumatların Epic Games işçilərinə, müştərilərinə və ya hər ikisinə aid olduğu hələlik bəlli deyil. Mogilevich adlı qrup məlumatları satışa çıxarsa da, heç bir sübut paylaşmayıb. Bundan əlavə, bu vaxta qədər Epic Games-dən heç bir rəsmi açıqlama verilməyib. Bununla belə, Mogilevich adlı qrup şirkətə martın 4-nə qədər vaxt verib. Xatırladaq ki, bu qrup əvvəllər Nissan-ın törəmə şirkəti olan Infiniti ABŞ-ı hədəf almışdı. Ümumiyyətlə son dövrlərdə platformaların serverlərinə hücumların sayı çoxalıb.
