Çinin son dövrlərdə elektrikli avtomobil sənayesində liderliyi ələ keçirməsi bir çox avropalı və amerikalı elektromobil istehsalçılarını narahat edib. Hətta Elon Musk belə Çin elektromobilləri barədə ticarət qadağalarının tətbiq edilməsi ilə bağlı xəbərdarlıq edir. Görünən odur ki, Elon belə çinin ucuz və kompakt elektromobilləri barədə narahatdır. Elona görə çinin öndə gedən elektrikli avtomobil brendlərinə ticarət məhdudiyyətləri tətbiq edilməsə çinli elektromobil şirkətləri rəqiblərini “məhv edəcəklər”.
Qeyd edək ki, BYD brendi elektromobil satışlarında ilk dəfə olaraq Tesla brendini ötməyi bacarmışdı. Elon Musk da məhz BYD brendi daha ucuz və kompakt elektromobilləri istehsal edəcəyi ilə bağlı elan verdikdən sonra xəbərdarlıq edib. Qazanclarla bağlı analitiklərlə görüşdən sonra verdiyi açıqlamada Musk, Çin avtomobil şirkətlərinin çox rəqabətli şirkətlər olduğunu və heç bir ticarət qadağası qoyulmasa, dünyanın əksər avtomobil şirkətlərini məhv edəcəklərini bildirib. Mask ticarət məhdudiyyətlərini dünyada ədalətli biznes mühitinin formalaşması üçün də tələb etdiyini bildirib.
Ümumiyyətlə ötən il elektrikli avtomobil satışlarında ciddi qiymət müharibəsi gedirdi. Hətta bu mübarizə çərçivəsində bir çox yeni elektrikli avtomobil istehsalçısı iflasa uğrayaraq rəqibləri ilə birləşmək məcburiyyətində də qaldı. Tesla brendinin Model Y elektromobili ötən il ən çox satılan elektromobillərdən olsa da, çinlilər hələ də dünya bazarında hegemonluq etməyə davam edir. Musk çinli elektromobil istehsalçıları ilə rəqabət aparmaq üçün 2025-ci ildə daha ucuz və kompakt Model 2 elektromobilini təqdim etmək niyyətindədir.
