Günümüzdə soyğunçuluq halları çox fərqli üsullarla həyata keçirilir. Belə ki, bu üsullar o qədər çox olur ki, hətta beynəlxalq səviyyədə məşhur olan şirkətlər belə bəzən bunun qarşısını ala bilmir. Qeyd edək ki, dünyada məşhur adı açıqlanmayan bir şirkət işçisinin Deepfake texnologiyası ilə aldadılmasından sonra şirkət 25 milyon dollar itirib. Şirkət işçisinin verdiyi məlumata görə fırıldaqçılar onu şirkət rəhbərlərini təqlid edərək aldadıblar.
Honq-Konq polisi məsələ ilə bağlə ictimaiyyətə məlumat verib ki, sözügedən işçi şirkətin İngiltərədə yerləşən maliyyə direktoru və digər həmkarları ilə video zəngdə iştirak edib. Məhz bu video zəng çərçivəsində isə fırıldaqçılar Deepfake texnologiyasının qorxunc üsullarından birini istifadə edərək işçini aldatmağı bacarıblar. Şirkətin Honq-Konq şöbəsində çalışan bu işçi yanvar ayında şirkətin Böyük Britaniyada yerləşən maliyyə direktoru tərəfindən bir şəxsi mesaj əldə edib. Daha sonra isə həmin mesajdan gələn məlumatlar əsasında o, video zəngə qoşulub.
Məlumatlara görə, işçi bu görüş zamanı aldığı təlimat əsasında Honq-Konqun müxtəlif bank hesablarına təxminən 25,6 milyon dollar köçürüb. Fırıldaqdan bir həftə sonra işçi şirkətin baş ofisi ilə əlaqə saxladıqda nəyinsə səhv olduğunu anlayıb. Şirkət və işçilərin adları açıqlanmasa da, fırıldaqçıların ictimaiyyətə açıq olan sosial media kimi platformalardakı video və audiolar vasitəsi ilə deepfake texnologiyasından istifadə etdikləri bildirilib.
