Dünyaca məşhur Disney, yeni Disney oyun kainatını yaratmaq üçün əməkdaşlıq çərçivəsində Fortnite və Unreal Engine istehsalçısı “Epic Games”-ə 1,5 milyard dollar sərmayə qoyacağını açıqladı. Habelə bu əməkdaşlıq və investisiya ilə iki şirkət metaverse tərəfində də Disney oyun kainatının qurulması üçün əhəmiyyətli addım atacaq. Qeyd edək ki, bu sərmayə ilə bağlı Disney şirkətinin CEO-su Bob Iger CNBC-yə müsahibəsində məlumat verib.
Disney onu da qeyd edib ki, yeni əməkdaşlıq ilə dünyaca məşhur oyunlarda xüsusilə Fortnite-da istifadəçilər Disney, Pixar, Marvel, Star Wars və Avatar kimi məzmunlarda yer alan hekayələr və ya personajlar əsasında oynaya biləcək. Yəni Disney “Epic Games”-ə 1.5 milyard dollar sərmayə qoymaqla sadəcə metaverse tərəfinə fokuslanmır. Artıq bir çox Epic Games oyununda Disney personajları ilə oynamaq, izləmək, alış-veriş etmək və ya onlarla qarşılıqlı əlaqədə olmaq imkanı olacaq. Şirkət həmçinin bildirib ki, oyunçular öz hekayələrini və təcrübələrini yarada biləcəklər və bütün bunlar Unreal Engine tərəfindən dəstəklənəcək.
Bob Iger bildirib ki, “Bu sərmayə Disneyin oyun dünyasına indiyə qədərki, ən böyük girişi, böyümə və genişlənməsi üçün əhəmiyyatlı imkanlar təqdim edir. Biz pərəstişkarlarımızın sevdikləri Disney hekayələri və dünyalarını yeni yollarla təcrübədən keçirmələri üçün səbirsizlənirik”. Həmçinin, Epic Games CEO-su Tim Sweeney əlavə edib ki, “Biz Disney və Fortnite icmalarını bir araya gətirəcək daimi, açıq və qarşılıqlı fəaliyyət göstərən ekosistem yaratmaq üçün tamamilə yeni bir şey üzərində əməkdaşlıq edirik”.
