Elektrikli avtomobilləri ilə müxtəlif regionlarda lider olan Çin artıq dünya avtomobil sənayesini də ələ keçirdi. Ümumiyyətlə elektromobillərə olan marağın artdığı bu dövrlərdə Çinin avtomobil sənayesi sürətlə genişləndi. Hətta tezliklə Çin dünyanın ən böyük avtomobil ixracatçısı titulunu da qazana bilər. Alternativ enerji mənbələrindən istifadə edən avtomobilləri ilə müxtəlif regionlarda liderlik edən çin indi yaponiyadan sadəcə az fərqlə geridədir.
Xatırladaq ki, ötən günlərdə Çinin BYD brendi Tesla brendini ötərək dünyanın ən çox elektromobil satan şirkəti olmağı bacarmışdı. Bəs Çin son dövrlərdə avtomobil sənayesini necə ələ keçirdi? Əslində bu sualın cavabını tapmaq üçün çox da dərindən araşdırma aparmağa ehtiyac yoxdur. Belə ki, Rusiya-Ukrayna müharibəsindən sonrakı dövrdə olan satışlara və hesabatlara nəzər salsaq səbəbin məhz buradan qaynaqlandığını görə bilərik. Bildiyimiz kimi, müharibə səbəbi ilə Avropa və ABŞ o cümlədən bu ölkələrdə fəaliyyət göstərən bütün şirkətlər Rusiyadan üz döndərmişdi. Çin şirkətləri isə Rusiyada boşalan bazara daxil olaraq avtomobil sənayesində ciddi inkişaf əldə etməyi bacarıb.
Hətta Nikkai Asianın məlumatına görə, Çin Avtomobil İstehsalçıları Birliyi ötən ilin ilk 11 ayında 4,41 milyon avtomobil ixrac edib. 2022-ci ildən bəri isə Çin ixrac etdiyi avtomobillərin sayını 58% artırıb. Əvvəlki il ən çox avtomobil ixrac edən ölkə olan Yaponiya ötən ilin ilk 11 ayında 3.99 milyon avtomobil ixrac etsə də, yekunda Çini kiçik fərqlə qabaqlaya bilib. Məlumatlara görə Çin Rusiya bazarında satışlarını 7 dəfə artırıb. Xüsusilə Avropa şirkətlərinin tətbiq etdiyi embarqodan sonra boş qalan bazarı Asiya nəhəngi ələ keçirmiş kimi görünür.
