Ötən həftələrdə Avropa Birliyi tərəfindən Çin mərkəzli elektrikli avtomobillərə əlavə 25% vergi tətbiq edilməsi ilə bağlı qərar elan edilmişdi. İndi isə Çin Avropanın bu addımını qarşılıqsız qoymayaraq Avropa mərkəzli daxili yanma mühərrikli avtomobillərə 25% vergi tətbiq edir. Xatırladaq ki, son qərar ilə birlikdə Çin elektromobillərinə Avropada tətbiq edilən verginin miqdarı 38.1%-ə qədər artmışdı.
Çinli elektrik avtomobil istehsalçıları daxili yanma mühərrikləri (ICE) olan Avropa avtomobillərinə 25 faiz vergi tələb edirlər. Bu təklif Avropa İttifaqının Çin istehsalı olan elektrik avtomobillərinin idxal rüsumunu 38,1 faizə çatdırmaq qərarına cavab hesab olunur. CCTV xəbər verir ki, bu tələb çərşənbə axşamı Pekində Çinin Ticarət Nazirliyi ilə altı Avropa və dörd Çin avtomobil istehsalçısının, eləcə də müxtəlif sənaye və tədqiqat təşkilatlarının nümayəndələri arasında keçirilən qapalı görüşdə edilib. Qeyd edək ki, 2023-cü ildə Çinə 2,5 litr və daha böyük daxili yanma mühərrikli təxminən 250 min avtomobil idxal edilib.
Keçən həftə Avropa İttifaqı Çin elektrik avtomobillərinə tarifləri artırmağı planlaşdırdığını elan etmişdi. Dövlətə məxsus avtomobil istehsalçısı SAIC Motor (keçmiş Shanghai Automotive) 48,1 faiz məcmu vergi ilə ən çox zərər çəkən istehsalçı olaraq bilinir. Buraya SAIC, MG və IM kimi markalar daxildir. May ayında MG Almaniyada ən çox satılan Çin elektrik avtomobil markası olaraq da böyük bir uğura imza atıb. Məhz yeni addımların atılması da Çin elektromobillərinin Avropada getdikcə böyük bir bazar payına sahib olması ilə əlaqələndirilir. Görüş zamanı Çinin ticarət nümayəndəsi də Avropa Birliyini rüsumları artırmaq üçün araşdırmadan bəhanə kimi istifadə etməkdə ittiham edib. Avropa Komissiyasının fikrincə, yeni tariflər ədalətli rəqabəti təmin etməyə yönəlib. Çinlilər 2023-cü ildə Aİ-də elektrik avtomobil bazar paylarını 2019-cu ildə 0,5%-dən 8,2%-ə qədər artırıblar. Onlar həmçinin Avropada yerli istehsala hazırlaşırlar.
