Yalnız fantastik filmlərdə gördüyümüz səhnələr artıq reallığa çevrilir. Belə ki, dünyanın ən böyük avtomobil şirkətlərindən biri olan BMW öz zavodlarında insanabənzər robotlar istifadə edəcək. Figure şirkəti bu gün ilk insanabənzər robotunun ABŞ-da fəaliyyət göstərən BMW zavoduna gələcəyini və orada xidmət göstərəcəyini açıqlayıb. Qeyd edək ki, Spartanburg fabriki BMW brendinin ABŞ-dakı tək fabrikidir. 2019-cu ildən bəri 8 milyon kvadrat metrlik ərazidə yerləşən bu zavod Alman avtomobil nəhənginin digər zavodları arasında ən yüksək səmərəliliyə malikdir.
Sadəcə 10 ay əvvəl gizli rejimdən çıxan Figure, öz robotlarını qorxuducu sürətdə inkişaf etdirməyi bacarıb. Şirkət ən yüksək təcrübəli komanda sayəsində prototipləri sadəcə 1 il ərzində hazırlayıb. Ötən həftələrdə şirkət Figure 01 robotunun avtonom şəkildə qəhvə hazırladığı videosunu yayımlayaraq daha bir mərhələyə çatdığını elan etmişdi. Maraqlısı budur ki, robot bir sıra videolara baxdıqdan sonra qəhvədəmləyəndən necə istifadə edəcəyini təkbaşına başa düşüb. Artıq real və faydalı iş görməyə hazır olan insanabənzər robotlar BMW zavodlarında təlim prosesinə başlayıb.
Əslində insanbənzər robotlar daha əvvəl Amazon şirkəti tərəfindən istifadə edilmişdi. Belə ki, Agility Robotics adlı şirkətin robotlarından istifadə edən Amazon məhz bu şirkətin əsas investorudur. Əlavə olaraq qeyd edək ki, BMW brendinin hələlik hansı sayda Figure 01 alacağı və ya onu zavodlarında hansı məqsədlər üçün istifadə edəcəyi məlum deyil. Sadəcə 1 ərzində real iş görməyə hazır olan bu robotların gələn il nələri bacara biləcəyini düşünmək insanı həqiqətən də qorxudur.
