İsveçli tədqiqatçılar bitkilərin böyüməsini sürətləndirən yeni elektron torpaq adlı texnologiya hazırlayıblar. İsveçin Linköpinq Universitetinin tədqiqatçıları bildirir ki, eSoil adlanan torpaq bitkilərin böyüməsini orta hesabla 50% artırıb. Ümumiyyətlə bu texnologiya hidroponik üsulla yetişdirilən bitki köklərinin daha sürətli böyüməsini nəzərdə tutur. Elektrik siqnallarının göndərilməsi nəticəsinə torpaq bitki köklərinə birbaşa təsir edir və onların böyümə sürətini artırır.
Tədqiqatçılar kənd təsərrüfatında inqilabi yenilik edərək, bitkilərin böyüməsini sürətləndirən yeni elektron torpaq hazırlayıb. Qeyd edək ki, eSoil adlandırılan bu texnologiya əsasən sensor və OLED displeylərdə istifadə olunan PEDOT adlı keçirici polimerlə qarışdırılmış üzvi materiallardan ibarətdir. Tədqiqatın rəhbəri Eleni Stavrinidou açıqlamasında bildirib ki, torpağın keçiriciliyi bitki köklərinin stimullaşdırılması üçün zəruri hesab olunur. Məhz bu elektron torpaq sınaqdan keçirilərkən əkilmiş bitkilərə 15 gün ərzində 0.5V-a qədər kiçik gərginlik tətbiq ediblər. Yekunda isə bitkinin kökləri stimullaşdırıldığı üçün onun böyümə sürəti də artır.
Beləliklə yeni elektron torpaq kənd təsərrüfarından gübrələrin istifadə olunmasını əhəmiyyətli dərəcədə azalda bilər. eSoil hazırda ən böyük problemlərdən biri olan iqlim dəyişikliyi səbəbi ilə azalan məhsuldarlığı yenidən bərpa edə və kənd təsərrüfatında canlanmaya yol aça bilər. Hələlik isə tədqiqatçılar sınaqlara davam etdiyindən bu texnologiya istifadəyə verilməyib. Hazırda tədqiqatçılar elektron torpağın yalnız bitkinin ilkin böyümə mərhələsində effektiv olduğunu vurğulayıb. Lakin onlar bu texnologiyanın ümumilikdə bitkinin müxtəlif böyümə mərhələlərində daha sürətli böyüməsini təmin etməsü üçün araşdırmalar aparır.
