Apple ən son təqdim etdiyi flaqman ağıllı saatlarının satışlarını dayandıracaq. Belə ki, Apple ABŞ-da Watch S9 və Watch Ultra 2 ağıllı saatlarını satmağı patent mübahisələri səbəbi ilə dayandıracaq. Ümumiyyətlə şirkətin ağıllı saatları əsasən dəqiq funksiyaları, güclü çipseti və keyfiyyətli ekranına görə bazarda seçilirdi. Apple sağlamlıq tərəfində işləyən texnologiya şirkəti Masimo ilə uzun müddətdir ki, patent mübahisəsində idi. İndi isə texnologiya nəhəngi 21 dekabr tarixindən etibarən ABŞ-da ağıllı saat satışlarını dayandırır.
Apple Watch modellərində xüsusilə Watch S9 və Watch Ultra 2 saatlarında istifadə olunan sensorlar səbəbindən ABŞ Beynəlxalq Ticarət Komissiyası Masimonun patent hüququnu mühafizə edib. Beləliklə Apple flaqman ağıllı saatlarını Masimo şirkətinin patent hüququnu pozduğu üçün satışdan qaldırır. Ümumiyyətlə ilin sonu satışların əhəmiyyətli dərəcədə artdığını nəzərə alsaq, bu texnologiya nəhəngi üçün böyük zərbə hesab olunur. Məhz yeni qərardan sonra texnologiya nəhənginin gələn il təqdim etməsi gözlənilən AirPods 4 və Watch S10 modelləri ilə bağlı da yeniliklər ortaya çıxıb.
Amerikalı texnologiya nəhəngi gələn il yeni Watch S10 saatını tamamilə fərqli dizaynda təqdim edəcək. Mark Qurmanın sözlərinə görə Apple hələlik tam olaraq hansı dizayndan istifadə edəciyini qərarlaşdırmayıb. Onun sözlərinə görə şirkəti AirPods 4 modelini də 2 versiyada təklif edəcək. Dizayn tərəfində isə daha nazik və daha kəskin dizayn xəttinə üstünlük veriləcək. Habelə yeni ağıllı saat artıq qan təzyiqini yüksək dəqiqliklə ölçə biləcək.
