Bildiyimiz kimi, Apple brendi ötən günlərdə qarşımıza yeni qarışıq reallıq eynəyi Vision Pro ilə çıxmışdı. ABŞ-da 3500 dollar qiymət etiketi ilə satışa çıxarılan bu cihaz olduqca böyük marağa səbəb olmuşdu. Texnologiya həvəskarları cihazın qiyməti barədə müxtəlif fikirlər və iddialar səsləndirirdilər. Lakin bu gün məlum olub ki, Apple Vision Pro modelinin istehsal dəyəri satış qiymətindən təxminən 2 dəfə az imiş.
Omdia-nın araşdırmasına görə, Vision Pro modelində istifadə edilən bütün komponentlərin dəyəri Apple üçün ümumilikdə 1542 dollara başa gəlir. Qeyd edək ki, bu komponentlər arasında ən bahalısı 2 düymlük mikro OLED ekrandır. Bu ekranlar ümumilikdə 23 milyon piksel təklif edir. Apple şirkətinin dediyinə görə bu, “4K televizordan belə daha çox piksel təklif olunduğunu bildirir”. Omdia-nın apardığı araşdırmaya görə bu displeylərin hər biri 228 dollara yəni, hər qulaqlıq üçün 456 dollara başa gəlir. Təbii ki, Apple şirkətinin yeni və ilk qarışıq reallıq eynəyi üçün heç bir komponentdən qənaət etmədiyi və keyfiyyəti ən yüksək səviyyədə saxladığı hər kəsə məlumdur.
Apple Vision Pro modelinin istehsal dəyəri araşdırması nəticəsində ikinci ən bahalı komponent M2 və R1 çipsetləri olmuşdur. Qeyd edək ki, M2 əsas çipsetdir və ilk dəfə 2022-ci ildə MacBook Air modelində qarşımıza çıxmışdı. Bu çipsetlərin ümumi dəyəri birlikdə 240 dollar təşkil edir. CNBC-nin qeyd etdiyi kimi, bu proqnozlaşdırılan rəqəmlərdən Apple-ın mənfəət marjasını təxmin etmək çətindir, çünki o, tədqiqat və təkmilləşdirmə xərclərini, qablaşdırma, göndərmə, satış, marketinq və ilkin xərclər əlavə edə biləcək kapital xərclərini nəzərə almır. Bununla belə, araşdırma, cihazda ayrı-ayrı hissələrin nə qədər bahalı olduğu barədə fikir formalaşdırır.
Məşhur analitik Ming-Chi Kuonun fikrincə, istehsalın mürəkkəbliyi səbəbindən Apple-ın 2024-cü ildə 400.000-dən az Vision Pro qulaqlıqları istehsal edəcəyi gözlənilir. ununla belə, Apple-ın hazırda Apple Vision Pro-nun yeni, daha sərfəli versiyası üzərində işlədiyi bildirilir. Cihazdakı çiplər, çox güman ki, Mac səviyyəli çiplərdən daha çox iPhone ilə bərabər olacaq. Bu isə öz növbəsində həm performansın, həm də qiymətin müəyyən qədər azalmasına səbəb olacaq. Qeyd edək ki, yeni sərfəli versiya 2025-ci ilin sonunda təqdim edilə bilər.
