Apple bu dəfə işçiləri ilə problem yaşayıb. Belə ki, Apple şirkəti rüşvət aldıqları mobil oyun tərtibatçılarının oyunlarını təbliğ edən beş Çinli App Store əməkdaşını işdən çıxarıb. Apple tərəfindən aparılan araşdırma nəticəsində şirkət işçilərini qanunsuz əməllərinə görə qovdu. “The Information” saytının məlumatına görə, 5 Çinli App Store əməkdaşı daha çox gəlir əldə edə bilmək üçün mobil oyun tərtibatçıları ilə qanunsuz razılıq əldə edib.
Amerikalı texnologiya nəhəngi bu dəfə işçilərini dərindən araşdırıb. Nəticədə isə 5 çinli App Store əməkdaşını işdən qovub. Müəyyən edilib ki, sözügedən əməkdaşlar icazəsiz mobil oyun tərtibatçıları ilə əlaqə saxlayaraq şirkət qaydalarını pozub. Bildiyimiz kimi, mobil oyun sənayesi son dərəcə gəlirlidir. Hətta Apple tətbiqlər mağazasındakı oyunlardan ciddi məbləğlərdə gəlir əldə edir. Bəzən biz App Store tətbiqinə daxil olarkən bəzi tətbiqlərin reklam olunduğunun şahidi oluruq. Məhz 5 çinli Apple əməkdaşı da öz səlahiyyətlərindən qanunsuz istifadə edib bəzi oyunları istifadəçilərin qarşısına daha çox çıxarıb və reklam edib.
Qeyd edək ki, Apple araşdırmaya 2022-ci ildə başlayıb. Bu il isə araşdırmanın nəticəsinə uyğun olaraq Apple işçilərini qovdu. İşdən çıxarılan işçilər App Store-un ana səhifəsində nümayiş olunacaq proqram və oyunların seçilməsinə cavabdeh idilər. Əsasən mağazanın əsas səhifəsində daha çox diqqət çəkən və populyar tətbiqlər, o cümlədən oyunlar nümayiş olunur. Lakin bu işçilər rüşvət müqabilində bəzi mobil oyun tərtibatçıları ilə ortaq olub. Maraqlısı budur ki, oyun tərtibatçıları işçilərə pul vermək əvəzinə onları gecə klublarına aparıb və onlara yemək alıblar.
