Apple şirkətinin istehsalı olan smartfonları Android ekosistemindəki cihazlardan ayıran əsas xüsusiyyətlərdən biri tətbiq daxili reklamlardır. Doğrudur, bəzi Android istehsalçılarının reklam strategiyası tətbiq daxili reklamlara yer verməyə bilər və ya flaqmanlarında tətbiq daxili reklamlar qapadılmış ola bilər. Lakin bir çox halda həmin reklamlar şirkətlər üçün sabit gəlir mənbəyi rolunu oynayır. Ona görə də smartfonlar arasında sistem tətbiqləri daxilində belə reklamları tez-tez müşahidə etmək olur. Göründüyü qədərilə Android smartfon istehsalçılarından ilhamlanan Apple şirkəti də iPhone modellərində bənzər bir reklam strategiyası tətbiq etməklə bağlı sınaqlar aparır.
iPhone 14 seriyası tətbiq daxili reklam xüsusiyyətlərini başlada bilər
iPhone modellərinə standart olaraq quraşdırılmış olaraq gələn Xəritələr, Kitablar, Pdocast kimi tətbiqlər hal-hazırda daxili reklam xüsusiyyətinə sahib deyillər. Lakin Bloomberg resursundan Apple modelləri barədə yeniliklər bölüşməsi ilə tanınan Mark Gurman tərəfindən verilən məlumata görə bu vəziyyət yaxın vaxtlarda dəyişə bilər.
Belə ki, Apple şirkətinin artıq samrtfonlarında daxili reklamları test etdiyi bildirilir. Məsələn, yeniliklə birlikdə iPhone modelinizin xəritələr tətbiqi daxil olduqda tətbiq sizə mağaza, restoran və ya sizə maraqlı ola biləcək yerlərin reklamını çıxaracaq. iPhone modellərində göstərilən bəzi reklam və ya reklamlar daha çox istifadəçilərə yararlı ola biləcək şəkildə seçilməlidir.
Lakin Apple şirkətinin əsas məqsədi bundan ibarətdir ki, hansı brend reklamı üçün daha çox məbləğ verəcəksə onun reklamı önə çıxarılsın. Yəni xəritələr tətbiqinə Azərbaycanda daxil olduqda “Flan adresə getmək istəyirsən? O zaman bu taksidən istifadə et” deyə reklam görmə ehtimalınız fikrimizcə daha çox olacaq.
Test edilmiş bu yeniliyin sistem tətbiqlərinə nə vaxtdan genişmiqyaslı inteqrasiya ediləcəyi hələlik dəqiq bilinmir. Apple oxşar xüsusiyyəti iPhone modelləri üçün AppStore mağazasında uzun bir müddətdir tətbiq edir.
