Avropa Birliyinin Rəqəmsal Bazarlar Aktı (DMA) qaydalarını pozmaqda ittiham olunan ilk şirkət ABŞ mərkəzli Apple şirkəti olub. Qeyd edək ki, daha əvvəl bir çox texnologiya nəhəngi Avropa Birliyinin Rəqəmsal Bazarlar Aktı çərçivəsində yeniliklər etməyə məcbur qalmışdı. Məhz bu yenilikləri tətbiq etməkdə məcbur qalan şirkətlərdən biri də Apple şirkətidir.
DMA çərçivəsində tətbiqlərini Apple App Store vasitəsilə yayan tərtibatçılar müştərilərini daha ucuz alternativ alış imkanları haqqında pulsuz məlumatlandırmalı və onları asanlıqla bu təkliflərə yönləndirməlidirlər. Avropa Birliyi bildirir ki, Apple bunu tam yerinə yetirməyib. Yaradılan komissiyanın verdiyi press-relizdə deyilirdi ki, “Tərtibatçılar alternativ paylama kanallarında təklifləri təşviq etmək üçün tətbiq daxilində qiymət məlumatı təqdim edə və ya müştəriləri ilə başqa şəkildə əlaqə saxlaya bilməzlər”. Avropa Komissiyası həmçinin Apple-ın Avropada alternativ iOS proqram bazarlarına dəstəyi, o cümlədən tərtibatçılardan aldığı “əsas texnologiya haqqı” ilə bağlı araşdırmaya başlayıb.
Əgər Apple-ın DMA-nı pozduğu aydın şəkildə müəyyən edilərsə və Apple lazımi dəyişiklikləri etməzsə, şirkət dünya üzrə gəlirinin 10 faizinə qədər cərimə ilə üzləşə bilər. Beləliklə, Apple DMA qaydalarını pozmaqdan ittiham olunan ilk şirkət olub. Keçən həftə mövzu ilə bağlı açıqlama verən AB rəsmisi Margrethe Vestager, Apple-ın etdiyi dəyişikliklərin DMA tələblərinə uyğun olduğuna inanmadığını söyləmişdi. Vestager həmçinin bildirib ki, “Bizim Apple ilə bir sıra problemlərimiz var və mən onları çox ciddi hesab edirəm. Apple kimi böyük bir şirkətin qaydalara əməl etmədiyinə dair şübhələrimiz olması məni çox təəccübləndirdi”.
