Counterpoint tədqiqat şirkəti 2023-cü ilin birinci rübü üçün smartfon bazarındakı vəziyyətin hesabatını təqdim edib. Təəccüblüdür ki, Apple və Samsung şirkətlərinin əməliyyat gəlirləri qlobal smartfon bazarının əməliyyat gəlirlərinin 96%-ni təşkil edir. Hesabtda bundan əlavə qlobal smartfon bazarındakı cihaz tədarükü barədə məlumatlar da yer alır. Ümumi olaraq müqayisə etsək, 2023-cü il texnologiya şirkətləri üçün elə də uğurlu olmayıb. Ötən il ilə müqayisədə smartfon tədarükü 14% və ya 22.4 milyon ədəd azalıb. Xatırladaq ki, keçən ilin ilk rübündə bu göstərici 326.4 milyon idi. İndi isə bu rəqəm sadəcə 280.2 milyondur. Məhz bu səbəbdən də bir çox texnologiya şirkətləri iqtisadi krizə daxil olur. Hətta işçilərini ixtisara salmağa məcbur olurlar.
Counterpoint tədqiqat şirkətinin hesabatında qeyd olunub ki, 2023-cü ilin birinci rübündə qlobal smartfon bazarında ən çox smartfon tədarük edən şirkət Samsung-dur. Belə ki, koreyalı texnologiya nəhəngi ümumi tədarükün 21%-ni həyata keçirib. Apple şirkəti isə əzəli rəqibindən sadəcə 1 faiz geridə qalır. Üçüncü yerdə isə 11% ilə Xioami brendi, onun gerisində 10% ilə Oppo, 7% ilə Vivo şirkətləri dördüncü və beşinci yerləri tuturlar. Qeyd etdiyimiz kimi, hesabata əsasən məlum olub ki, Apple şirkətin əməliyyat gəlirləri Samsung şirkətindən 72% daha yüksəkdir. Apple və Samsung şirkətinin ümumi gəlirləri isə qlobal bazarın 96%-ni təşkil edir.
Maraqlısı budur ki, Samsung şirkəti Apple-dan daha çox smartfon tədarükü etsə də daha az mənfəət əldə edib. Bu da Apple şirkətinin yürütdüyü marketinq siyasətinin daha uğurlu olduğunu göstərir. Qlobal smartfon bazarındakı 4% mənfəət isə yerdə qalan texnologiya şirkətlərinin payına düşür. Nəticə olaraq qeyd edə bilərik kİ, Apple və Samsung şirkəti iqtisadi krizdə nə qədər geriləsə də gəlirləri hələ də artır. Hətta Apple öz mənfəət rekordunu yeniləyib.
