Apple şirkətinin nəhayət uzun aradan sonra iPhone 14 Pro seriyası ilə birlikdə yeni çəntik dizaynına keçid etdiyi hərkəsə məlumdur. İndi isə Apple şirkətinin indiyə qədər sınaqdan keçirdiyi bütün çəntik dizaynı ortaya çıxıb, görünən odur ki, Apple ən düzgün qərarı verib. Yeni ortaya çıxan dizaynlar texnologiya nəhənginin yeni dizayna keçid etmədən əvvəl nə qədər düşündüyünü və mümkün həlləri nəzərdən keçirdiyi sübut edir.
iPhone 14 Pro ilə həyatımıza daxil olan, daha sonra isə iPhone 15 seriyası ilə birlikdə davam etdirilən yeni çəntik dizaynı dinamik ada şirkətin ən son sınaqdan keçirdiyi dizayn olub. Belə ki, Apple dinamik ada dizaynından əvvəl də bir çox çəntik dizaynı sınaqdan keçiribmiş. Dinamik adadan əvvəl Apple ekranın sağ tərəfində vaxtı, WiFi siqnal səviyyəsini, ekran parlaqlığını, səs səviyyəsini və batareya faizini göstərən sürətli giriş menyusunu sınaqdan keçirib. Əslində sürətli giriş menyusu ikinci çəntik kimi də görünür və istifadə edilmədikdə ekrandan itir.
Apple şirkətinin sınaqdan keçirdiyi digər bir dizayn isə ekranın yuxarı hissəsində tamamilə qara status çubuğu ilə çəntiyi gizlətmək idi. Lakin bu dizayn da Apple-ın istəklərinə və maraqlarına uyğun gəlməyib. Apple son olaraq dinamik adaya keçməzdən əvvəl daha bir dizaynı da sınaqdan keçirib. Belə ki, texnologiya nəhəngi dinamik adanı sabit bir ölçüdə saxlamağı düşünüb. Daha sonra isə bunun istifadəçilərə maneə ola biləcəyini düşünüb. Qeyd edək ki, Apple bütün iPhone 15 modellərində dinamik adadan istifadə edir. Eyni dizayn yəqin ki, iPhone 16 seriyasında da davam edəcək.
