UX/UI dizaynerlərin yaxından tanıdığı və sektorda çoxları tərəfindən rəğbətlə istifadə olunan Figma platforması mühim bir keçid mərhələsindədir. Belə ki, Adobe şirkəti komanda şəklində onlayn dizayn etməyi sevənlərin işlətdiyi Figma platformasını satın almağa hazırlaşdığı bildirilib. Bu barədə Bloomberg resursu bu gün məlumat yaymışdı. Günorta saatlarında mövzuya yaxın mənbələr alqı-satqı müqaviləsinin tezliklə imzalancağını qeyd edirdi. Lakin şirkət artıq bu barədə rəsmi məlumat yayımlayıb.
Mənbələrə görə, razılaşma bu gün axşam elan ediləcəkdi. Elə gözlənildiyi kimi də Adobe tərəfindən razılaşmanın əldə edildiyi açıqlanıb və Figma platformasının 20 milyard dollara satın alındığı bildirilib. Üstəlik Adobe şirkəti Figma tətbiqini aldıqdan sonra platformanın qiyməti inanılmaz dərəcədə yüksəlib. Bu gündən etibarən Figma platformasının 15 milyard dollar dəyər qazandığı bildirilir. Dizayn qruplarına sayt və ya proqramları birlikdə dizayn etməyə imkan verən Figma tətbiqi Airbnb, Google, Netflix, Twitter kimi bir çox mühüm şirkətə xidmət göstərmişdir. Müəssisənin investorları arasında Kleiner Perkins, Index Ventures və Greylock Partners var.
Xatırladaq ki, Adobe son illərdə aldığı şirkətlərlə tez-tez gündəmə gəlib. 2018-ci ildə Marketo və Magneto platformasını satın alan Adobe, Workfront satın alması ilə iki il ərzində marketinq sahəsinə ümumilikdə 8 milyard dollar sərmayə qoyub. 2021-ci ildə isə Adobe video hazırlama platforması olan Frame.io şirkətini təxminən 1,3 milyard dollara alıb. İddialara görə Figma platformasının alınmasında əsas məqsədlərdən biri, Adobe şirkətinin Canva kimi hazır dizayn şablonları olan nəhəng ilə mübarizəyə girmək istəməsidir.
