Bakıda COP29-a hazırlıq məqsədilə dövlət-özəl tərəfdaşlığı çərçivəsində “Ambisiyaların artırılması və fəaliyyətə təkan: COP-29 Dayanıqlı biznes forumu” baş tutub. 4SİM-in icraçı direktoru Fariz Cəfərov “COP29: Texnologiya və İnnovasiya” panelində iştirak edib.
![COP-29](https://tedroid.com/media/2024/05/4sim-cop-29-biznes-forumu-1-1024x791.jpeg)
COP29-un müəyyən edilmiş prezidenti, Ekologiya və Təbii Sərvətlər naziri Muxtar Babayev bildirib ki, Azərbaycan 2030-cu ilə qədər atmosferə atılan zərərli qazları 40 faiz azaldacaq. Qeyd olunub ki, ölkənin yaşıl enerjiyə keçid çərçivəsində həyata keçirdiyi tədbirlər nəticəsində 2030-cu ilə kimi enerji təminatının 30 faizi yaşıl enerjidən ibarət olacaq.
Forumda iqlim dəyişikliklərinin müxtəlif ölkələrdə böyük fəsadlar yaradaraq biznesin və ümumilikdə iqtisadiyyatın inkişafını ləngitdiyi vurğulanıb. Çıxış edən natiqlər özəl sektorun iqlimlə bağlı təşəbbüs və təkliflərlə daha fəal olmasına çağırış ediblər.
![COP-29](https://tedroid.com/media/2024/05/4sim-cop-29-biznes-forumu-1-1-1024x623.jpeg)
Panel sessiyasında iştirak edən Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov, 4SİM-in gördüyü işlər barədə məlumat verib. O, süni intellekt və rəqəmsal əkiz texnologiyalarını tətbiq etməklə iqlim dəyişikliyinə təsir edən amilləri azaltmağın mümkün olduğunu qeyd edib. Bu istiqamətdə Azərbaycanda su itkilərinin azaldılması üçün rəqəmsal əkiz texnologiyası əsaslı layihənin həyata keçiriləcəyini bildirib. Məlumat verilib ki, 4SİM həmçinin ölkədə Gələcək nəsil texnologiyalar mərkəzinin yaradılması üzərində çalışır.
Bildirlib ki, Coursera şirkəti ilə bu il 200000 vətəndaşın öz bilik və bacarıqlarını inkişaf etdirməsi üçün “Milli Proqram” layihəsi icra olunacaq. Proqram çərçivəsində iqlim və davamlı inkişafla bağlı kursları əhatə edən “COP29 sub akademiyası” yaradılacaq.
Qeyd olunub ki, qurum enerji keçid məsələlərində Dünya İqtisadi Forumunun “AI in energy” platforması ilə əməkdaşlıq edir və Azərbaycanda oxşar icmanın iştirakı ilə müzakirə platforması yaradılıb.