Son illərdə dəyəri 1 milyard dollar üzərində olan əksər startapların 20%-lik hissəsi “Fintech” sahəsinə bağlıdır. Bildiyimiz kimi, “Fintech” sektorundakı başlıca faktor hansısa bir “şirkətin” maliyyə həllərini rəqəmsal formada müştəriyə təmin etməsi ilə əlaqədar olmuşdur. Lakin biometrik identifikasiyanın təkmilləşməsi və elektron pul kisələrində bütün məlumatların vahidləşdirilməsi bu sektoru yavaş-yavaş “IDTech” anlayışına doğru yönləndirir. Belə ki, “Fintech” sektorunun “IDTech” üzrə irəliləməsi yeni nəsil maliyyə texnologiyalarının “şirkətlər” əvəzinə “fərdi şəxslərə” inteqrasiya edilməsini asanlaşdırmaqdadır. Yəni, “IDTech” sahib olduğunuz bütün maddiyatı, biometrik məlumatlarınızla birlikdə şəxsiyyətiniz üzərində vahid bir quruluşa çevirir. Nəticədə maliyyə həlləri başda olmaqla, həyata keçirəcəyiniz bütün proseslərin birbaşa “identifikasiyanız” ilə əlaqləndirilməsi mümkün olacaq. Yaxşı bəs, “Fintech” anlayışı nədir?
“Fintech” nədir?
Bu anlayış “maliyyə” və “texnologiya” terminlərinin birləşməsi ilə ifadə olunan maliyyə texnologiyasıdır. Ənənəvi maliyyə xidmətlərini sadələşdirmək, rəqəmsallaşdırmaq və avtomatlaşdırmaq məqsədi daşıyan yeni texnologiyanı təsvir etmək üçün istifadə olunur. İlk ortaya çıxdığı zaman maliyyə xidmətlərinin texnologiya ilə həyata keçirilməsi olaraq görülsə də, bu gün baş verən müxtəlif inkişaflarla daha çox əhəmiyyət qazanmışdır.
FinTech özəl proqram təminatı və alqoritmlərdən istifadə etməklə həm bizneslərə, həm də istehlakçılara maliyyə əməliyyatları proseslərini daha sürətli və daha yaxşı idarə etməyə kömək etmək üçün istifadə olunur. Mobil bankçılıq, sığorta, kripto pul, virtual reallıq kimi geniş xidmətlərə malik olan bu maliyyə texnologiyası sürətlə inkişaf edən sənayeni əhatə edir. Bu maliyyə texnologiyası sürətli və avtomatlaşdırılmış biznes prosesləri gələcək üçün biznes strategiyalarını müəyyənləşdirməyə kömək edir. Fintech tətbiqləri praktik iş axını təklif etməklə biznesin səmərəliliyini artırır. Bu, asan əlçatanlığı və vaxta qənaət təmin edir. Məkandan asılı olmayaraq idarə oluna bilən çevik bir quruluş təklif edir.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
