Azərbaycan startap ekosistemi inkişaf etməyə davam edir. Belə ki, bu dəfə insanlara lüks moda brendlərinə məxsus geyimləri almağa, satmağa və eləcə də kəşf etməyə imkan verən yeni nəsil qarderob Reluxe öz əhatə dairəsini genişlədir. Qeyd edək ki, Azərbaycan startapı olan Reluxe, bu ilin aprel ayından etibarən Gürcüstanda fəaliyyətə başlayır.
İstifadəçilərinə lüks geyimləri ən uyğun qiymətlərlə almağa, satmağa və icarəyə verməyə imkan verən startap aprel ayından etibarən Gürcüstanın paytaxtı Tbilisidə xidmətə başlayacaq. Bu məqsədlə artıq Gürcüstandan olan istifadəçilər üçün platformada “erkən qeydiyyat” (Early Access) bölməsi də yaradılıb. Reluxe startapı bildirib ki, “Azərbaycanda 2 ildən qısa müddətdə artıq 10 mindən çox istifadəçisi olan Reluxe platformasına qonşu ölkələrdən də böyük maraq olduğunu nəzərə alan təsisçilərimiz, məhsulu ilk olaraq Gürcüstan daha sonra isə Türkiyə və Avropa bazarlarına çıxarmağı planlaşdırır”.
Ümumiyyətlə, bu yolda Reluxe komandasını dəstəkləyən və onlarla birlikdə addımlayan ABB Innovation, Lotfi Zadeh Technology Center (LTC) və SABAH.HUB-da böyük əməyə sahibdir. Ümid edirik ki, gələcəkdə Azərbaycan ekosistemi daha da inkişaf edəcək və qlobal bazarlara açılacaq.
