Böyük bir ehtimalla normal halda heç birinizin ağlına gəlməsə də bəzən fəlakətlər olsa nələrin baş verəcəyi barədə düşünmüsünüz. Belə ki, ağlınızdan keçənləri yoxlamaq üçün bəzi simulyasiyalar daim mütəxəssislər tərəfindən yaradılır. Lakin simulyasiyaların əksəriyyəti çox vaxt ictimaiyyət üçün açıq olmur. Buna baxmayaraq günü-gündən artan qəribə saytlar axtardığınız suallara cavab tapmaqla bağlı yaxşı kömək olmağı bacarır. Həmin saytlardan biri də Neal Agarwal tərəfindən təkmilləşdirilmiş və yeni gündəmə gələn “Asteroid Launcher” platformasıdır. Neal.fun veb-saytı tərəfindən yayımlanan platforma, dünyanın istənilən yerinə müxtəlif şərtlər altında asteroid toqquşduraraq, yaranan vəziyyətin necə ola biləcəyini insanlara göstərir.
“Asteroid Launcher” ilə toqquşma sonrasında yaranan krater, zəlzələ, külək, səs şiddəti kimi detalları görmək mümkündür
Dünya xəritəsinin istənilən bir nöqtəsində asteroid toqquşmasını simulyasiya edən platforma bir sıra maraqlı detalları özündə birləşdirir. Saytda asteroidin növünü, ölçüsün, sürətini və hətta yerə hansı bucaq altında toqquşmasını da seçmək mümkündür. Toqquşmadan sonra kraterin yarandığı hissədən başlayaraq ətrafa göstərilən təsir, təsir zamanı yaranan istilikdən ölən insanların sayı, kraterin ölçüsü kimi detallar xəritədə göstərilir.
Asteroidin toqquşmasından sonra sizə verilən məlumatlar isə bir neçə əsas hissədən ibarət olur. Bunlara asteroidin effektiv təsir radiusu, yaranan zəlzələ şiddəti və külək sürəti, o cümlədən alov topunun ətrafa yaydığı istilik və.s aiddir. Layihənin yaradıcı olan Neal Agarwal qeyd edir ki, uşaqlıq vaxtlarından Deep Impact və Armagedddon kimi filmləri heyranlıqla izləyib. Ona görə də həmişə asteroidin yerlə toqquşma ssenariləri ona maraqlı gəlib. Nəticədə asteroidlərdən ilhamlanan Agarwal, riyazi və fiziki modelləri, həmçinin asteroid araşdırma tədqiqatlarını bir yerə toplayaraq belə bir simulator hazırlamaq qərarı verib. Simulatoru elə bu linkə keçərək özünüz testdən keçirə bilərsiniz.
