Bütün dünyada olduğu kimi Azərbaycanda da iPhone modellərinə olduqca yüksək tələbat var. Hətta tələbat o qədər yüksəkdir ki, bəzən cihazlar ölkəyə daxil olmamışdan əvvəl belə artıq insanlar tərəfindən sifariş edilmiş olur. Rəsmi mağazalarda yaxın günlərdən etibarən satışda olması gözlənilən iPhone 14 seriyası smartfonlar ötən həftədən etibarən 3000-4500 AZN aralığında bəzi satıcılar tərəfindən təklif olunur. Stoklarını daim artırmaq istəyən satıcılar, tələbatın yüksək olmasından yararlanmaq istəyənlər və ya fərqli məqsədlərə sahib insanlar isə bəzən arzuolunmaz addımlar atırlar. Bir neçə saat əvvəl ortaya çıxan məlumata görə Dövlət Gömrük Komitəsi tərəfindən tam olaraq 81 ədəd qanunsuz keçirilən iPhone 14 modeli Hava Nəqliyyatında Baş Gömrük İdarəsinin əməkdaşları tərəfindən tutulub.
Rusiya vətəndaşının çamadanından 40 ədəd, Azərbaycan Respublikası vətəndaşının çamadanından isə 41 ədəd olmaqla ümumilikdə 81 ədəd iPhone 14 aşkarlanıb
DGK Mətbuat və İctimaiyyətlə Əlaqələr İdarəsi tərəfindən qeyd edilən məlumata görə Rusiya vətəndaşı və Azərbaycan vətəndaşı olan iki şəxs Doha-Bakı aviareysi ilə ölkəyə səfər edib. “Yaşıl kanal” buraxılış sistemi ilə gömrük nəzarət zonasını tərk etmək istəyən bu şəxslər, gömrük işçiləri tərəfindən “Qırmızı kanal”-a doğru yönləndiriliblər. Vətəndaşlara aid olan çamadanlar rentgen aparatından keçirilərkən isə gömrük işçiləri çamadanlarda onlarla smartfona bənzər təsvir olduğu ilə qarşılaşıblar. Çamadanları açıb yoxlayan gömrük işçiləri Rusiya vətəndaşının çamadanından 40 ədəd, Azərbaycan Respublikası vətəndaşının çamadanından isə 41 ədəd olmaqla ümumilikdə 81 ədəd iPhone 14 seriyası smartfon aşkarlayıblar. Gömrük orqanına əvvəlcədən təqdim edilməyən, şifahi, elektron və yazılı formada bəyan olunmayan müxtəlif yaddaşlarda olan iPhone 14 seriyası müxtəlif çeşidlərə malik olubş
Belə ki, 15 ədəd iPhone 14 Pro 128GB, 20 ədəd iPhone 14 Pro 256GB, 5 ədəd iPhone 14 Pro 512GB, 20 ədəd iPhone 14 Pro Max 128GB, 20 ədəd iPhone 14 Pro Max 256GB, 1 ədəd iPhone 13 Pro 256GB smartfon aşkar edilib. İctimaiyyətlə əlaqələr idarəsi hər iki faktla bağlı araşdırma aparıldığını bildirir.
