2019-cu ildə kino dünyasının ən yadda qalan filmlərindən olan Joker filminin davamının gələcəyi bu gün elan edildi. Belə ki, ilk filmin rejissoru və yazıçısı Todd Filips yeni filmin ssenari görüntüsünü öz Instagram hesabında paylaşıb.
Yeni filmin adı Joker: Folie a Deux olacaq
Joker, DC Comics-in son dövrdə ən çox bəyənilən və uğurlu filmlərindən biridir. 2019-cu ildə yayımlanan ilk filmindən dərhal sonra artıq filmin ikinci hissəsi barədə danışıqlar başlamışdı. Bu gün DC-nin məşhur personajının tanıdıldığı ilk filmdən sonra nəhayət çoxdan gözlənilən xəbər gəldi. Filmin rejissoru və yazıçısı Todd Filips-in paylaşdığı Instagram postunun ilk görüntüsündə ssenarinin üz qabığı, ikinci görüntüdə isə Joaquin Phoenix-in bu ssenarini oxuduğu şəkil yerləşdirilib. Şəkildən filmin adının Joker: Folie a Deux olacağı görünür. Filmin adındakı ‘Falie a Deux’ iki nəfərin – adətən bir cütün bütün qavrayışları ilə reallıqdan uzaqlaşmasına səbəb olan psixiatrik sindrom üçün istifadə olunan termindir.
Çəkilişlərə hazırlıqlar başlaya bilər
Bildirək ki, rejissor film haqqında başqa heç bir məlumat verməyib. Ssenarinin üz qabığına baxdıqda görünən digər məqam isə budur ki, ssenari 2022-ci il mayın 18-də dərc olunub. Buda onu göstərir ki, Joker filminin ssenarisinin yazılması prosesi artıq sona çatıb və çəkilişlər üçün hazırlıqlar başlayır.
Joker filmi uğursuz komediya aktyoru olan Arthur Fleck-in həyatından bəhs edir. Daima cəmiyyət tərəfindən təklənən baş personaj Arthur həyatını iki maska taxaraq keçirir. Gündüzlər dolanmaq üçün üzünə kloun maskası taxır, gecələr heç vaxt silə bilmədiyi digər maskasını taxır. Atasız böyüyən Arthur-u anası Happy (xoşbəxt) ləqəbi ilə çağırır. Bu ləqəb Arthura daxili ağrısını gizlətməyə kömək edir. Ancaq məruz qaldığı zorakılıq onun getdikcə daha çox anti-sosial bir insan olmasına səbəb olur. Yavaş-yavaş psixologiyası korlanan Arthur bir müddət sonra özünü Gotham City-də cinayət və xaos içində tapır. Zamanla öz şəxsiyyətindən uzaqlaşır və Joker xarakterinə bürünür.
