Bildiyimiz kimi elmə məlum olan yeganə insanların yaşaması üçün əlverişli olan planet Yerdir. Lakin milyonlarla ildir var olan planetinimizdə artıq insanların sayı 8 milyardı ötüb. Eyni zamanda, təbiət bizə müntəzəm yaşamağa imkan vermədiyi üçün planetimizi həyat üçün rahat adlandırmaq çətindir. Son dövrlərdə iqlim dəyişikliyi səbəbindən insanlar istidən əziyyət çəkirlər ki, bu da həm fiziki, həm də psixi sağlamlığa mənfi təsir göstərir. Alimlər bütün canlı orqanizmlər üçün optimal mühit temperaturunun nə olduğunu müəyyən etməyə çalışırlar və bu məqsədlə geniş araşdırmalar aparırlar. Ümumiyyətlə hər kəsin özünü yaxşı hiss etməsi üçün və rahat yaşaya bilməsi üçün Yer kürəsində ideal temperatur nə olmalıdır?
Alimlər bildirir ki, insanlar üçün ideal temperatur +20 dərəcədir. İnsanlar çöldə, içəridə və ya avtomobildə hava soyuyanda dərisi qızarır və titrəməyə başlayır. Qan damarlarımız isinmək üçün daralır və əzələlərimiz bədəni isti saxlamaq üçün büzülür. Soyuqda özümüzü yorğun hiss edirik, çünki bədənimiz maddələr mübadiləsi yolu ilə istilik istehsal etməyə çalışır. Lakin havanın çox isti olması da insanlar üçün zərərlidir. Belə ki, havalar isti olanda qan damarlarımız bədəni sərinlətmək üçün genişlənir. Hətta bədən maye ifraz edərək özünü sərinlətməyə çalışır, yekunda isə tər əmələ gəlir.
Bəs heyvanlar soyuğa və ya istiyə necə dözürlər? Bildiyimiz kimi, Afrikadakı dəvələr +40 dərəcədən yuxarı temperaturda yaşaya bilirlər. Bunun səbəbi daha çox onların strukturunun ətraf mühitin istiliyinə qarşı təbii izolyasiya rolunu oynaması ilə bağlıdır. Onların orqanizmi tərləmə və tənəffüs yolu ilə su itkisini minimuma endirərək susuzlaşmanın qarşısını alır. Həmçinin dəvələrin donqarlarında suya və enerjiyə çevrilən yağ yataqları var.
Tədqiqatçılar bir çox tədqiqatların nəticələrini təsdiqləyərək bu istiliyin təkcə məməlilər üçün olmadığını qeyd ediblər. Belə ki, çoxsaylı məlumatların təhlili göstərir ki, canlıların əksəriyyəti və hətta mikroorqanizmlər temperaturun +20 dərəcə olduğu ərazilərdə yaşayırlar. Lakin son illərdə meydana gələn və əhəmiyyətli səviyyədə arta iqlim dəyişikliyi buna imkan vermir.
