Yaponiyada yerləşən Nippon Telegraph and Phone (NTT) telekommunikasiya şirkəti mövcud fiber optik infrastrukturu dəyişdirmədən tutumu artırmağa yönəlmiş yeni bir texnologiyanın inkişaf etdirildiyini elan edib. Şirkət qalınlığını və ya diametrini dəyişdirmədən ənənəvi liflərdən dörd dəfə çox məlumat daşıya bilən dördnüvəli optik lif hazırlayıb. Kabelin fiziki ölçülərinin qorunması həm sualtı kabel çəkən gəmilər, həm də yerüstü əlaqə sistemləri və terminal avadanlıqları ilə uyğunluğu təmin etmək üçün vacibdir. Beləliklə, Yaponiyada şirkət mövcud olan fiber optik kabelin tutumunu düz 4 dəfə artırmağa nail olub.
Yeni hazırlanmış çoxnüvəli lif (MCF) tək nüvə əvəzinə eyni şüşə strukturunda dörd ayrı nüvəyə malikdir. Bu, “məkan multipleksləşdirmə” metodundan istifadə edərək tək bir kabel üzərindən eyni vaxtda dörd ayrı optik siqnalın ötürülməsinə imkan verir. Hazırkı sualtı kabellərdə adətən 48 lif olsa da, bu texnologiya tək bir kabel xəttinin ümumi məlumat tutumu 192 nüvəyə çatmasına imkan verir. NTT həmçinin bu yeni lifi mövcud sistemlərə asanlıqla inteqrasiya etmək üçün müxtəlif köməkçi avadanlıqlar hazırlayıb. Bunlara klassik yerüstü lifləri dördnüvəli sualtı kabellərə qoşa bilən xüsusi qovşaq qutuları və təknüvəli sistemlərlə uyğunluğu təmin edən terminal avadanlıqları daxildir. Dəniz dibində iki MCF kabelinin bir-birinə qoşulmasına imkan verən həllər də mövcuddur.
\Dünyada 5G, süni intellekt və bulud xidmətlərinin sürətli inkişafı ilə məlumatların ötürülməsinə ehtiyac durmadan artır. Telekommunikasiya şirkətləri bu tələbi ödəmək üçün yeni infrastruktur qura bilərlər, lakin bu, həm baha başa gəlir, həm də vaxt aparır. Lakin NTT-nin texnologiyası mövcud infrastrukturu tamamilə yeniləmədən tutumu artırmağı mümkün etməklə daha sürətli və daha qənaətcil bir həll təklif edir. Bu yeni lif texnologiyasının 2029-cu ildə istifadəyə verilməsi planlaşdırılır. Tətbiq edildikdə, məlumat trafikini daha səmərəli idarə etməyə və yeni layihələrin daha səmərəli və rəqabətli şəkildə həyata keçirilməsinə kömək edəcəyi gözlənilir.
