Qardaş ölkə Türkiyədə ötən il IMEI qeydiyyat ödənişlərindən toplanan məbləğin 6.2 milyard TL yəni, 350 milyon manat olduğu açıqlanıb. Qeyd edək ki, bu barədə Türkiyənin Xəzinə və Maliyyə naziri Mehmet Şimşek məlumat verib.
Bolu millət vəkili və Türkiyə Böyük Millət Məclisinin Sənaye və Ticarət Komissiyasının üzvü Türker Ateş-in xaricdən sərnişin ilə birgə gətirilən telefonlardan alınan qeydiyyat haqqına 200%-dən çox artımla bağlı parlamentə təqdim etdiyi suala cavab olaraq Mehmet Şimşek məlumatı açıqlayıb. Onun sözlərinə görə Türkiyədə ötən ilin 11 ayı ərzində IMEI qeydiyyat ödənişlərindən sadəcə 6.2 milyard TL yəni 350 milyon manat toplanıb.
Bundan əlavə Türkiyədə 2024-cü il 1 yanvar tarixindən etibarən IMEI qeydiyyat rüsumu 20 min TL yəni, 1128 manat deyil, 31.692 TL yəni 1788 manat olub. Yəni xaricdən Türkiyəyə gətirilən bütün cihazlar üçün insanlar 1800 manata yaxın rüsum ödəməli olacaqlar. Əgər qısa hesablama aparsaq görərik ki, xaricdə Apple Store mağazasından 999 dollara alınan 128GB yaddaşlı iPhone 15 Pro üçün Türkiyə vətəndaşları təxminən 31 min TL yəni 1750 manat ödəməlidir. Həmçinin ölkəyə gələrkən IMEI qeydiyyat rüsumu üçün də onlar smartfonun demək olar ki, dəyəri məbləğdə rüsum ödəyərək onu ölkəyə keçirə bilər. Yekunda isə türklər iPhone 15 Pro modelini özləri xaricdən almağa çalışsa 62000 TL və ya 3500 manat ödəməli olacaq. Hazırda isə Türkiyədəki Apple Store mağazalarında iPhone 15 Pro 69999 TL yəni 3950 manat qiymət etiketinə sahibdir.
