iSeeCars analitiklərinin yeni hesabatı, Tesla elektrik avtomobillərinin avtomobil markaları arasında ən yüksək ölümlə nəticələnən qəza nisbətinə sahib olduğunu ortaya çıxarıb. Beləliklə, analitiklərin hesabatının nəticəsinə əsasən, Tesla ən təhlükəli avtomobil markası olaraq tanınıb və bu vəziyyətin ən böyük səbəbkarlarından biri Elon Musk-dır.
Bildiyimiz kimi, Elon Musk müntəzəm olaraq şirkətin elektrik avtomobillərinin digər şirkətlərin məhsulları arasında ən etibarlısı olduğunu bildirir. Bu, isə sürücülərin avtomobil ilə bağlı fikirlərinə təsir edir. Belə ki, son dövrlərdə baş verən Tesla qəzaların əksəriyyəti əslində sürücülərin avtomobilə çox güvənməsinin nəticəsidir. Milli Avtomobil Yolları Trafik Təhlükəsizliyi Administrasiyasının (NHTSA) məlumatlarını təhlil edən iSeeCars analitikləri Tesla Model S və Model Y elektrik avtomobillərinin ən təhlükəli avtomobillər arasında olduğunu göstəriblər.
2018-2022-ci model il avtomobillərinin daxil olduğu qəza hesabatlarına görə, Tesla Model S və Model Y elektrik avtomobilləri sərnişinlərin ölümünə görə yolda ən təhlükəli iki avtomobil olaraq seçilib. Bununla belə, ümumilikdə ən çox ölüm halı digər avtomobillərin – Hyundai Venue (hər milyard milə 13,9 ölüm), Chevrolet Corvette və Mitsubishi Mirage (hər biri 13,6), Porsche 911 və Honda CR-V Hybrid (13,2) ilə bağlı qəzalarda baş verib. Tesla Model Y elektrik avtomobili 10.6 ilə siyahıda 6-cı yeri, Model S isə 5,8 ilə 21-ci yerdədir.
Maraqlısı budur ki, bütovlükdə Tesla bütün avtomobil markaları arasında ən yüksək ölümlə nəticələnən qəza nisbətinə malikdir, ondan sonra Kia, Buick, Dodge və Hyundai gəlir. 1 milyard mil (1,6 milyard km) qət etdiyimiz məsafəyə orta hesabla Tesla modellərində 5.6 ölüm hadisəsi baş verir. Kia 5.5, Buick 4.8, Dodge 4.4 və Hyundai 3.9 ilə siyahıda digər yerləri tutur. Model sıralamalarında olduğu kimi, yüksək ölümcül qəza nisbətlərinin avtomobil dizaynından çox sürücü davranışını əks etdirməsi mümkündür. Analitiklər, nəqliyyat vasitələri ilə bağlı heç bir şikayətlərinin olmadığını da vurğulayırlar. Bu isə sürücülərin diqqətsiz olması və sükan darəetmə sistemlərinin elementlərinə həddən artıq etibar etməsi ilə əlaqələndirilir. Tesla-nın aqressiv reklamı dəfələrlə məhkəmə mövzusu olub və onun şişirdilmiş vədləri bu avtomobillərin bütün digər üstünlükləri ilə birlikdə dolayı yol ilə ölümlə nəticələnən qəzalara səbəb ola bildiyi iddia edilib.
