Broadcom, cihazda birbaşa real vaxt səs tərcüməsini həyata keçirən yeni bir süni intellekt çipinin hazırlandığını elan edib. CAMB.AI ilə tərəfdaşlıqda hazırlanmış bu yeni çipset, bulud bağlantısı tələb etmədən səs tərcüməsi, dublyaj və ekran məzmununun təsvirini həyata keçirə bilər. Bu xüsusiyyət həm əlçatanlığı artırmağı, həm də məxfilik və performans baxımından əhəmiyyətli üstünlüklər təklif etməyi hədəfləyir. Beləliklə, yeni hazırlanmış bu inqilabi süni intellekt çipi ilə real zamanda internetsiz şəraitdə belə tərcümə etmək mümkün olacaq.
Yeni süni intellekt çipi, bütün emalı cihazda lokal olaraq həyata keçirdiyi üçün ultra aşağı gecikmə və təkmilləşdirilmiş məxfilik vəd edir. Məlumatlar buluda göndərilmədiyi üçün simsiz bant genişliyi istifadəsi də əhəmiyyətli dərəcədə azalır. Bu, internet bağlantısına etibar etmədən daha sürətli tərcümə və təsvir etməyə imkan verir. Texnologiyanın digər diqqətəlayiq tərəfi vizual məzmunu səslə təsvir etmək qabiliyyətidir. Bu xüsusiyyəti nümayiş etdirmək üçün şirkət “Ratatoy” filmindən bir səhnədən istifadə edərək demo hazırladı. Süni intellekt səsi səhnəni müxtəlif dillərdə tərcümə edir və eyni zamanda mətn tərcüməsini ekranda göstərir. Bu, xüsusən də görmə qabiliyyəti zəif olan istifadəçilər üçün əhəmiyyətli dərəcədə əlçatanlıq təmin edə bilər.
Broadcom və CAMB.AI bildirirlər ki, bu yeni süni intellekt çipi cihazda 150-dən çox dili tərcümə edə biləcək. Hələlik onun hansı cihazlarda istifadə ediləcəyi və ya nə vaxt satışa çıxarılacağı açıqlanmayıb. Lakin, Broadcom və CAMB.AI texnologiyanın hələ sınaq mərhələsində olduğunu bildirirlər. Hazırkı nümayiş nəzarətli nümunə üzərində aparıldığı üçün real həyat ssenarilərində performansın və dəqiqliyin nə olacağı hələlik məlum deyil.
