Tədqiqatçılar bu dəfə süni intellekt ilə xəstəliklərin əvvəlcədən aşkar edilməsi üzərində çalışırlar. Bu çərçivədə isə məlum olub ki, süni intellekt dil şəkli ilə xəstəliyinizin nə olduğunu 98% dəqiqliklə tapa bilər. Belə ki, tədqiqatçılar dil şəkillərini maşın öyrənmə üsulu ilə təhlil edərək bəzi xəstəliklərə çox yüksək dəqiqliklə diaqnoz qoymağı bacarıblar.
Sağlamlıq diaqnozunun qədim formasını müasir maşın öyrənməsi ilə yeniləyən tədqiqatçılar yalnız dilinizə baxmaqla müəyyən xəstəlikləri aşkar edə biləcək əlamətdar sistem hazırlayıblar. Sistemin dəqiqlik səviyyəsinin mükəmmələ yaxın olduğu bildirilir. Beləliklə, süni intellekt ilə işləyən sistem sadəcə dil şəkli ilə xəstəliyinizin nə olduğunu tapa bilər. Ümumiyyətlə, həkimlər min illərdir ki, xəstələrin dillərinə baxaraq bəzi xəstəliklərə diaqnoz qoya biliblər. Çünki dilin rəngi və forması bədəndə baş verənlərlə bağlı mühüm məlumatlar verə bilər. Bu texnikanın 17-ci əsrdə qərb təbabətində populyarlıq qazandığı görünsə də, əslində ənənəvi Çin təbabətində təxminən 1115-ci ildən istifadə olunur.
Yaxşı dil analizinin dəyərini anlayan İraq Mərkəzi Texniki Universiteti və Cənubi Avstraliya Universitetinin tədqiqatçıları müxtəlif işıqlandırma şəraitində çəkilmiş 5260 dil şəkli üzərində maşın öyrənmə sistemini öyrədiblər. Onlar həmçinin sınaq üçün astma, şəkərli diabet və anemiya kimi tanınmış sağlamlıq vəziyyəti olan şəxslərin bir sıra şəkillərini də daxil ediblər. Daha sonra kameranı xəstənin dilindən 20 sm məsafədə yerləşdirərək sistemi sınaqdan keçiriblər və sistemdən diaqnoz yaratmağı xahiş ediblər. Sistem real vaxt rejimində 98% dəqiqliklə diaqnozlar yarada bilib.
