Google şirkətinin uzun müddətdir ki, haqqından məlumatlar sızdırılan Pixel 9 seriyası rəsmi olaraq bizlərə təqdim edilib. Belə ki, seriya daxilində bizlərə Pixel 9, Pixel 9 Pro Fold və Pixel 9 Pro, Pixel 9 Pro XL ayrılıqda təqdim edilib. Made by Google tədbirində dünyaya nümayiş edilən yeni smartfonlar öz güclərinin Samsung tərəfindən istehsal edilmiş Tensor G4 çipsetindən alırlar. İndi isə keçək cihazların detallarına.
Google Pixel 9 yeni təqdim olunsa da, bu cihaz haqqında demək olar ki, bütün detallar bizlərə bir neçə aydır ki, məlum olmuşdu. Google Pixel 9 və seriyanın digər üzvlərinin daha düz kənarları və arxa tərəfində ellips şəkilli kamera modulu mövcuddur. İlk olaraq bizi ekran tərəfində 080 x 2424 piksel təsvir ölçüsünə və 1-120 Hz yeniləmə sürətinə malik 6,3 düymlük OLED ekran qarşılayır. Gorilla Glass Victus 2 ilə qorunan bu ekran 2700 nit parlaqlığa sahib olub. Qeyd edək ki, smartfon Pixel 8 ilə müqayisədə daha böyük ekrana sahib olub.
Kamera tərəfinə keçdiyimiz zaman cihazın ön hissəsindəki 10,5 MP-lik selfi kamerası diqqəti çəkir. Arxa tərəfdə 50 MP əsas və 48 MP ultra geniş sensorlar kamera massivində yerləşir. Digər tərəfdən, əsas sensorda Super Res zoom funksiyası və 8x optik keyfiyyətli böyütmə funksiyası da mövcuddur. Proqram təminatı tərəfində Google bütün Pixel 9 ailəsi üçün Android 14 təklif edir. Ötən il olduğu kimi, şirkət 7 il ərzində bütün modellər üçün Android əməliyyat sistemi və təhlükəsizlik yeniləmələri vəd edir. Proqram təminatından söz düşmüşkən, Pixel seriyası da süni intellektdən öz payını alıb. Həmçinin smartfon 30 dəqiqə ərzində 55 faiz şarj olan 4700 mAs batareya həcminə sahib olub. Google-a görə, Pixel 9 Pixel 8-dən 20 faiz daha uzun batareya ömrü təqdim edəcək.
Süni intellekt tərəfində isə yeni Pixel 9 seriyası daxilində yer alan Pixel Screenshots adlı funksiya hadisələr, yerlər və s. kimi sonra xatırlamaq istədiyiniz məlumatları saxlamağa kömək edir. Bu funksiya skrinşotlarınızda “faydalı təfərrüatları yadda saxlayacaq və emal edəcək” və onlar vasitəsilə axtarış aparmağa imkan verəcək. Bir növ bu funksiya Windows-un mübahisəli Geri çağırma xüsusiyyətinə bənzəyir. Google həmçinin smartfonlara Add me adlı funksiya əlavə edib. Bu funksiya ilə şəkildə olmayan bir şəxsi də süni intellektlə şəkilə əlavə etmək mümkün olur. Gemini inteqrasiyasına malik olan yeni Pixel seriyalı modellər əvvəlki seriyalarda da olan Circle to Search ve Magic Editor alətlərinə malikdir.
Pixel 9 Pro Fold modeli bizə nə təklif edir?
Google Pixel 9 Pro Fold, sələfindən daha uzun və nazik bədənə və tamamilə düz açılan yeni dizayna malikdir. Pixel 6-dan bəri istifadə edilən üfüqi kamera dizaynının əvəzində indi küncdə daha kiçik və daha qalın kamera massivi yerləşir. Ağırlıq tərəfində Galaxy Z Fold 6 kimi rəqiblərindən daha ağırdır, lakin əvvəlki nəsillə müqayisədə yüngül hesab oluna bilər. Smartfonun qapaq ekranı 6,3 düym, əsas ekranı isə 8 düymdür. Qeyd edək ki, ekranlar 120Hz yenilənmə sürətinə və 2700 nit parlaqlığa sahib OLED panellərdir.
Pixel 9 Pro Fold kamera tərəfində 48MP əsas, 10.5MP telefoto və 12MP ultra geniş bucaqlı kamera ilə gəlir. Hər iki displeydə ön kamera 10 MP-dir. Maraqlısı budur ki, yeni smartfon, birinci nəsil Pixel Fold ilə müqayisədə daha az batareya tutumuna malikdir. Belə ki, smartfon indi 27W simsiz şarj dəstəkli 4650 mAs batareya həcminə sahib olub. Bu isə sələfindən 171 mAs daha az batareya həcminə bərabərdir. Seriyanın digər modelləri kimi Pixel 9 Pro Fold da süni intellekt xüsusiyyətləri ilə gəlir. Android 14 əsaslı smartfon 256GB və 512GB yaddaş versiyalarına da sahibdir.
Pixel 9 Pro və Pro XL hansı xüsusiyyətlərə sahibdir?
Google Pixel Pro modeli ilk dəfə olaraq bu seriyada iki fərqli ölçüdə bizlərə təklif olunur. Belə ki, bunlar müvafiq olaraq 6.3 düymlük ekrana sahib Pixel 9 Pro və 6.8 düymlük ekrana sahib olan Pixel 9 Pro Xl modelləridir. Hər iki model 120 Hz “Super Actua” ekrana sahib olub. Habelə, Pixel 9 seriyası daxilində flaqman hesab olunan bu modellər “Multimodality” xüsusiyyətli Gemini Nano-nun cihazda çalışmasına imkan verən Tensor G4 çipsetləri ilə təchiz edilib.
Qeyd edək ki, smartfonlar müvafiq olaraq 4700 mAs və 4060 mAs batareya həcminə sahib olub. Habelə, Google smartfonların 45 Vt sürətli şarj ilə yarım saatda 70% şarj ola biləcəyini iddia edir. Pixel 9 Pro və Pixel 9 Pro XL, “Google AI” adlı süni intellekt xüsusiyyətləri ilə gəlir. Bunlara qabaqcıl səs köməkçisi ilə sərbəst söhbət etməyə imkan verən Gemini Live daxildir. Bu xüsusiyyətə həmçinin birbaşa cihazınızla və ya Pixel Buds vasitəsilə səssiz əmrlərdən istifadə edərkən təcrübəni fərdiləşdirmək üçün 10 yeni səs daxildir. Bundan əlavə cihazda Pixel Studio adlı yeni proqram yer alır. Ən vacibi isə, Pixel 9 Pro və Pro XL Peyk Təcili SOS funksiyası ilə gələn ilk cihazlardır. Bu funksiya ilkin olaraq Amerika ilə məhdudlaşır və istifadəçilər bundan əlavə rüsum ödəmədən və operator məhdudiyyəti olmadan iki il ərzində istifadə edə biləcəklər.
Pixel 9 Pro və Pixel 9 Pro XL eyni kamera sisteminə malikdir. Hər iki cihaz, 50 MP əsas, 48 MP ultra geniş bucaqlı və 48 MP 5x telefoto kamerasına sahib olub. Smartfonun selfie kamerası isə 42MP olub. Kamera xüsusiyyətlərinə Video Boost tərəfindən dəstəklənən 8K 30FPS video qeydi, Pixel 9 Pro ilk dəfə 20x-ə qədər video rejimlərində istifadə oluna bilən Super Res Zoom funksiyası daxil edilib.
Pixel 9 seriyası qiymətləri
Qeyd edək ki, yeni Pixel 9 modelləri 22 Avqustdan etibarən 128GB yaddaş versiyasında 799 dollar, 256GB yaddaş versiyasında isə 899 dollar qiymət etiketi ilə satışa çıxarılacaq ki, qiymətlərin ötən ilkindən 100 dollar artıq olduğunu görmək mümkündür. Google Pixel 9 Pro Fold modeli isə 13 Avqustdan sifariş edilə bilinəcək, lakin 4 Sentyabrdan etibarən 1799 dollar qiymət etiketi ilə satışa çıxarılacaq. Son olaraq isə yeni Pixel 9 Pro və Pro XL modelləri 4 Sentyabr tarixindən müvafiq olaraq 999 dollar və 1099 dollar başlanğıc qiymətinə sahib olaraq satışa çıxarılacaq.
