Tokio Universiteti və Harvard Universitetinin alimləri robotlar üçün tamamilə yeni insanabənzər dəri hazırlayıblar. Maraqlısı budur ki, bu dəri eyni zamanda özünü sağaltmaq bacarığına sahibdir. Beləliklə, Terminator və ya digər gələcək mövzulu filmlərdə nümayiş olunan insanabənzər robotlara bir addım daha yaxınlaşırıq.
Tokio Universiteti və Harvard Universitetinin alimləri insanabənzər robotlar üçün tamamilə yeni dəri hazırlayıblar. Yeni dəri robot platformalarına daha çox hərəkətlilik, özünü sağaltma imkanları, hissetmə imkanları və getdikcə daha real görünən görünüş kimi potensial faydalar gətirir. Ancaq hələlik bu dəri kiçik, sevimli və çəhrayı üz üçün istifadə olunur. İnsan dərisinin bağlarından ilhamlanan tədqiqatçılar robotun üzünə dəri qatının yapışmasına kömək edən xüsusi deşiklər əlavə ediblər. Layihəyə rəhbərlik edən professor Shoji Takeuchi, biohibrid robototexnika sahəsində pioner kimi tanınır. O, bioloji əzələ toxumasından istifadə edərək yeriyən mini robotların, 3D-printerdə laboratoriya şəraitində yetişdirilən ətlərin, sağala bilən süni dərinin və digər yeniliklərin hazırlanmasına əvəzsiz rola malikdir.
Alimlər insan dərisini birləşdirən strukturları təqlid edərək və bərk materiallarda xüsusi hazırlanmış V formalı deşiklərdən istifadə edərək dərini mürəkkəb strukturlara birləşdirməyin yolunu tapıb. Beləliklə, robot dəri qopmadan və soyulmadan mexaniki komponentlərlə problemsiz hərəkət edə bilir. Tədqiqatçılar hesab edirlər ki, yeni dəri sayəsində robotlara bir sıra yeni qabiliyyətlər verilə bilər. Öz-özünə sağalmaq da bu qabiliyyətlər arasında yer alır. Tədqiqatçıların fikrincə, inkişaf etmiş bioloji dəri insan dərisini təqlid edə bilir. Buna görə də, bu süni dəri kiçik kəsikləri düzəldə, sinirləri və digər dəri orqanlarını birləşdirə, duyğu funksiyalarını aktivləşdirə bilər. Tədqiqatçılar həmçinin bu dərinin kosmetik, cərrahi üsulları və plastik cərrahiyyəsinin öyrənilməsində yeni era başlada biləcəyinə inanır.
