Təxminən yarım əsrdir ki, dünyada Yadplanetlilərin olduğu iddası mövcuddur. Hətta Pentaqon bu mövzu ilə bağlı xüsusi UFO işçi Qrupu da ayırıb. Ötən günlərdə isə Pentaqon Anomaliyalar üzrə Kompleks Tədqiqatlar İdarəsi və ya AARO yer səthində görünən Yadplanetli təhlili haqqında hesabat dərc edib. Qeyd edək ki, məlumatlar 1945-ci ildəki ilk hesabatlardan başlayaraq tam şəkildə təqdim olunub.
Pentaqon Anomaliyalar üzrə Kompleks Tədqiqatlar İdarəsi tərəfindən təqdim olunan məlumatlara görə, 1945-ci ildən bəri planetimizdə Yadplanetli izi aşkar edilməyib. Pentaqon bildirir ki, naməlum uçan cisimlərin xəbərləri ilə əlaqəli hər şey izah edilə bilər, çünki heç bir yadplanetli iştirak etməyib. Qeyd edək ki, AARO 2022-ci ilin yayında təsis edilib. AARO sadəcə uçan cisimləri deyil, eyni zamanda kosmosdakı, Yerdəki, sudakı və sualtındakı cisimləri də araşdırır və təhlil edir. Ümumiyyətlə, UFO termini “naməlum hava hadisələri” deməkdir. Bundan əlavə, NASA-da oxşar məqsədlər üçün yəni yadplanetli izini aşkar edə bilmək üçün bir qrup yaradılıb.
AARO hesabatın bir cildini daha sonra yayımlayacağını da elan edib. Agentlik iddia edilən UFO müşahidələrini araşdırmaqla yanaşı, ABŞ hökuməti və özəl şirkətlərin yadplanetli texnologiyası inkişaf etdirdikləri və onları ictimaiyyətdən gizlətdikləri iddialarını da araşdırır. Bundan əlavə, AARO keçmiş CIA işçilərinin yadplanetli texnologiya transferi əməliyyatlarında və təcrübələrində iştirakı yönümdə olan iddiaları da rədd edib. Hesabat müəllifləri bildiriblər ki, onların məqsədi Amerika ictimaiyyətinin uzun müddətdir ki, təxəyyülünü zəbt edən bir mövzu haqqında ətraflı məlumat verməkdir.
