Bakıda Rəqəmsal İnkişaf və Nəqliyyat naziri Rəşad Nəbiyev ilə “Starlink” peyk sisteminin qlobal lisenziyalar və yeni bazarlar üzrə direktoru Rebekka Slik Hanter arasında görüş baş tutub. Rəqəmsal İnkişaf və Nəqliyyat Nazirliyindən verilən məlumata görə, görüşdə “Starlink” genişzolaqlı peyk internet xidmətinin Azərbaycanda tətbiqi məsələləri müzakirə olunub.
Qeyd edək ki, müzakirələr əsasən yüksəksürətli, aşağı gecikmə müddəti olan internetin ənənəvi xidmətlərin hazırda məhdud olduğu ucqar ərazilərə və tranzit xətlərinə genişləndirilməsi ətrafında aparılıb. Xatırladaq ki, Azərbaycanın Kosmik Agentliyi olan “Azərkosmos” və SpaceX-in “Starlink” şirkəti arasında 9 may 2023-cü il tarixində reseller müqaviləsi imzalanmışdı. Hansı ki, bu müqavilə “Azərkosmos”a bütün ölkə ərazisində Starlink peyk internet xidmətlərini təklif etməyə imkan verir.
Bu görüş çərçivəsində, tərəflər “Starlink” peyk internet şəbəkəsinin Azərbaycanda istifadəsinin texniki və hüquqi aspektlərini müzakirə ediblər. Bundan əlavə, Rebekka Slik Hanter “Starlink” xidmətinin dünyada əhəmiyyətli dərəcədə genişlənməsi və Azərbaycana bu texnologiyanın gətirilməsi istiqamətində atılması gözlənilən bəzi mühüm addımlar barəsində Nazirə məlumat ötürüb. Qeyd edək ki, Starlink-in Azərbaycanda 50 Mbit/s-dən 500 Mbit/s-ə qədər internet sürətini təmin edəcəyi gözlənilir ki, bu da yükləmə sürətinin adətən 25 Mbit/s-dən 100 Mbit/s-ə qədər olduğu digər regionlarda müşahidə olunan sürətlərlə müqayisə oluna bilər.
Qiymət tərəfində isə bu xidmətin müxtəlif versiyalarda və qiymətlərdə təklif ediləcəyi düşünülür. Baza paketləri standart buraxılış zolağına giriş üçün ayda 90 dollardan başlayacaq və daha yüksək sürət tarifləri üçün ayda 5000 dollara qədər qalxacaq. Starlink xidmətlərinin ilkin olaraq 2023-cü ilin dördüncü rübündə Azərbaycan vətəndaşları üçün əlçatan olacağı gözlənilirdi. Lakin bu müddət 2024-cü ilə qədər uzadılmışdı, hətta indi xidmətin istifadəyə verilməsində gecikmələr olacağı gözlənilir.
