Elektrik cihazlarının tullantılarını azaltmağa çalışan kampaniya qrupları evlərdə boş qalan elektrik cihazları və xarab texnologiya məhsullarının yığılması ilə bağlı xəbərdarlıq edir. Bununla belə, əksər insanlar köhnə və ya xarab olmuş elektronik cihazlarını evlərində saxlamağa üstünlük verir. Elektrik cihazlarının tullantılarını azaltmağa çalışan kampaniya qrupu olan Material Focus son dörd ildə evlərdə tullantıların sayının orta hesabla 20-dən 30-a yüksəldiyini təxmin edir.
İngiltərədə aparılan araşdırmaya görə evlərdə olan tullantıların əsasını pult, mobil telefonlar və fenlər təşkil edir. Qeyd edək ki, Birləşmiş Millətlər Təşkilatı da bu cür tullantıların təkrar emalını tövsiyə edir. Özünü elektrikli məhsulların yığıcısı kimi qələmə verən Paul Bowtell bu cür materiallarla vidalaşa bilməyən biridir. Araşdırma zamanı Bowtell 40-dan çox elektrik əşyası olan qutuları nümayiş etdirərək və evinin çardaqındakı qutularda daha çox tullantıların olduğunu etiraf edib. Bristoldan olan Bowtell, bəzi məhsulları övladlarına vermək üçün saxladığını bildirib.
Material Focus-un direktoru Scott Butler deyir ki, müasir dünyada hər kəsin oxşar çəkməcə və ya qutusu mövcuddur. İnsanlar köhnə elektronik cihazlarını təkrar emal etməyə göndərmək istəmir və evlərində saxlayırlar. Butter bildirir ki, insanlar nə üçün istifadə olunacağı bəlli olmayan kabelləri, DVD pleyerləri və pultları evlərində mühafizə edirlər. Maraqlısı budur ki, İngiltərədəki evlərdə təxminən 880 milyon istifadə edilməyən cihaz saxlanılır. Scott bildirir ki, bu miqdarda məhsulun təkrar emal dəyəri 1 milyard funt-sterlinqə çata bilər. Köhnə noutbuklar, elektrik diş fırçaları və təraş maşınlarında polad, alüminium, mis, litium batareyaları və hətta hələ də istifadə oluna bilən qızıl var.
SWEEEP təkrar emal şirkətindən Justin Greenaway izah edir ki, məlumatların korlanmasının qarşısını almaq üçün kompüter daxilindəki bütün vacib əlaqələr qızılla tamamlanır. Onun sözlərinə görə, onlar bu qızılı bərpa etmək üçün kompüter hissələrini emal ediblər. Bundan əlavə araşdırmalar, Böyük Britaniyada hər il 103.000 ton elektrik enerjisi ilə işləyən məhsulun təkrar emal etmək əvəzinə çölə atıldığını göstərir.
