Ötən gün Apple brendi iPhone 6 Plus modelini “köhnəlmiş” modellər siyahısına əlavə edib. Bundan əlavə, texnologiya nəhəngi iPad mini 4 modelini klassik və ya başqa sözlə vintage məhsullar siyahısına əlavə edib. Bir zamanların əfsanəvi smartfonu olan və dünyada yüz minlərlə satılan iPhone 6 Plus artıq rəsmi olaraq köhnəlib.
Ümumiyyətlə, Apple şirkətinin məhsul siyasətinə əsasən, məhsulun son buraxılış tarixindən 7 il keçdikdə, məhsul rəsmi olaraq köhnəlmiş hesab olunur. Habelə, köhnəlmiş hesab olunan cihazla bağlı təmir və digər xidmətlər artıq Səlahiyyətli Orqanlar tərəfindən həyata keçirilmmir. Xatırladaq ki, Apple şirkəti 2014-cü ilin sentyabrında iPhone 6 və iPhone 6 Plus satışa çıxarmışdı. Bir zamanların flaqman modeli hesab olunan iPhone 6 Plus istehsalı 2016-cı ilin sentyabrında tamamilə dayandırılmışdı. Əslində iPhone 6 daha şanslı hesab oluna bilər. Belə ki, bu cihaz bir neçə il daha bəzi ölkələrdə pərakəndə satış üçün təklif edilmişdi.
Nəhayət, 2019-cu ildə іОЅ 13-ün istifadəyə verilməsi ilə yanaşı, іPhone 6 və iPhone 6 Plus dəstəyi tamamilə dayandırıldı. Bundan əlavə, dördüncü nəsil iPad mini modeli də artıq Apple tərəfindən “vintage” yəni klassik cihaz kimi təsnif olunur. Apple Store mağazaları ehtiyat hissələrin mövcudluğundan asılı olaraq gələcək 2 il ərzində hələ də vintage” məhsullarına xidmət göstərməyə davam edəcək. “Vintage” məhsulların siyahısına yalnız qırmızı rəngdə olan iPhone 8 və iPhone 8 Plus daxil edilmişdi.
