İnternet bu gün ən sadə kommunal tələblərimiz arasında çox vacib bir yerə sahibdir. Hətta artıq normal bir hala çevrilsə də getdiyimiz hər ünvanda soruşduğumuz ən birinci şey “internet varmı?” olur. Təəssüf ki, ölkəmizdə internet infrastrukturunun səviyyəsi bütün regionlarda arzu olunan vəziyyətdə deyil. Lakin bu xəbərin əsas mövzusu olan İngiltərə dünyanın ən güclü internet infrastrukturuna sahib ölkələri arasındadır. Buna baxmayaraq ölkə idarəçiləri mövcud infrastrukturdan da razı deyillər. Belə ki, İngiltərə yeni bir qanuni addım ataraq Böyük Britaniya ərazisində bütün yeni evlərin gigabit genişzolaqlı internet ilə təmin olunmasını məcburi edir.
1 gigabit internet ~1000 Mbps internet sürəti deməkdir
İngiltərə gigabit internetə olan məcburiyyətindən əlavə bu qanun çərçivəsində fərqli addımlar da atacaq. Belə ki, kirayəçilər bir çox hallarda ev sahibinin maraqlı olmaması səbəbi ilə yüksək sürətli internetdən məhrum olurlar. Hətta bəzi kənar yerlərdə iddialara görə fiber-optik xətlər yerinə mis kabellərdən istifadə olduğu kimi qalıb. Bu qanunun tələblərində isə kirayə yaşayanlar nəzərə alınmaqla, evə gigabit internet çəkdirmək istəyənlərin tələbi nəzərə alınacaq.
Ev sahibləri 35 gün ərzində mənzilinə genişzolaqlı internet çəkilməsi ilə bağlı tələbə cavab verməli olacaqlar. 35 gün müddətində ev sahibindən heç bir cavab gəlməyəcəyi təqdirdə mənzilə internet çəkməyi gözləyən gigabit internet provayderi məhkəmə yoluyla problemləri həll etməyə çalışacaq. Bu qanunla birlikdə təqribi 480.000 mənzildə milyonlarla kirayəçinin genişzolaqlı internetə sahib olması mümkün olacaq.
