İnnovasiya və Rəqəmsal İnkişaf Agentliyinin təşəbbüsü və “PASHA Holding” Şirkətlər Qrupunun dəstəyi ilə yaradılan “Holberton School Azərbaycan” ikinci dəfə məzunlarını yola salıb. 29 noyabr tarixində baş tutan tədbirdə 46 tələbə İKT sahəsindəki təhsillərini başa vuraraq məzun olub. Məzunların seçilməsi 1000 nəfər müraciətçi arasından həyata keçirilib. Bu tələbələrdən 35 nəfər “Foundations of Computer Science”, 11 nəfər isə “Full Stack Web Development” proqramını uğurla tamamlayıb.
Məzun olan tələbələrdən 16 nəfəri artıq işlə təmin olunub. Onların 26 nəfəri hazırda universitet tələbəsidir. Tələbələrdən 10 nəfər isə ölkənin müxtəlif regionlarından proqrama qoşulub.
Proqram çərçivəsində tələbələr yalnız müasir texnologiya biliklərinə deyil, həm də yumşaq bacarıqlara yiyələniblər. Tədris prosesi “peer-to-peer” öyrənmə metodu ilə təşkil edilib, bu da tələbələr arasında əməkdaşlıq, komanda işi və effektiv ünsiyyət bacarıqlarını inkişaf etdirib. Məzunlar həm texniki biliklərə, həm də liderlik bacarıqlarına yiyələnmək imkanı əldə ediblər.
“Holberton School Azərbaycan” ölkədə İKT sahəsində peşəkar mütəxəssislərin hazırlanması məqsədilə fəaliyyət göstərir. Bu günə qədər məktəbə 5000-ə yaxın müraciət daxil olub və 167 tələbəni əhatə edən dörd tədris dalğası həyata keçirilib.
Qeyd edək ki, “Holberton School Azərbaycan”, dünyaca məşhur “Holberton School” şəbəkəsinin bir hissəsidir. Məktəb, Silikon Vadisinin qabaqcıl texnoloji təcrübələri əsasında təhsil təqdim edərək, ölkəmizdə İKT sahəsində yüksək ixtisaslı kadrlar yetişdirir. Hazırda “Holberton School” şəbəkəsi 5 qitədə 20-dən çox ölkədə fəaliyyət göstərir və müxtəlif sahələr üzrə proqramlar təklif edir. Məktəb, dünya miqyasında tanınan metodologiyası ilə tələbələrə innovativ karyera yolları açmağa davam edir.
