Dünyadakı internet kabelləri okean boyunca uzanaraq ölkələri internet ilə təmin edir. Qeyd edək ki, dünyanadakı internet kabellərinin uzunluğu 1.3 milyon kilometrdir. Ötən günlərdə okean boyunca uzanan kabellərə milyonlarla dollar sərmayə qoyan Google şirkəti günəş qasırğalarının internet kabellərinə necə təsir edə biləcəyini araşdırıb. Araşdırmanın nəticəsi isə Google Cloud platformasından paylaşılıb.
Günəş qasırğaları internet kabellərinə necə təsir göstərir?
Google mütəxəssisləri Günəş qasırğasının sualtındakı internet kabellərinə təsirini araşdırarkən 1859-cu ildə baş vermiş Karrinqton hadisəsinə istinad edib. Qeyd edək ki, bu hadisə zamanı geomaqnit qasırğa nəticəsində teleqraf şəbəkəsinə ciddi zərər dəymişdi. Həmçinin Karrinqton hadisəsi dünya tarixindəki ən güclü geomaqnit qasırğası kimi xatırlanır. Mütəxəssislər bildirir ki, Karrinqton hadisəsi zamanı güclü elektrik axımı yaranması səbəbi ilə bütün teleqraf şəbəkəsi sıradan çıxmışdı.
Hal-hazırda isə dünyada interneti təmin edən və okean boyunca uzanan internet kabelləri 10 min Volt gərginliyə malikdir. Belə ki, bir neçə təbəqə ilə əhatə olunan və nazik mis liflər ilə interneti təmin edən kabellərin hər bir ucu 5 min Volt gərginliyi təmin edir. Həmçinin internet kabelləri optik siqnal gücləndiricilər ilə təchiz olunub.
Beləliklə Google mütəxəssisləri müasir internet kabellərinin Günəş qasırğalarına qarşı dözümlü olduğu qənaətinə gəlib. Həmçinin onlar qeyd edib ki, Karrinqton hadisəsi zamanı yaranmış Günəş qasırğası müasir dövrdə meydana gələrsə, sualtında yerləşən internet kabellərinə heçbir təsir göstərə bilməz. Əlavə olaraq qeyd edək ki, şirkət araşdırmanın daha ətraflı araşdırma məqaləsinin 2023-cü ildə dərc edilməsi planlaşdırılır.
