Hazırda dünyada saysız-hesabsız kondisioner qurğularından istifadə olunur. Hətta bu cür qurğuların sayı durmadan artır. Təəssüf ki, bu gün bütün kondisioner qurğuları ətraf mühitə zərər vuran soyuducu maddələrdən və kompressorlardan istifadə edirlər. Lakin alimlərin yeni aşkar etdiyi texnologiya ilə gələcəkdə kondisionerlər soyuducu maddə və kompressorlardan xilas olacaq. Belə ki, bir qrup alim kompressorsuz və soyuducu maddlərdən istifadə etməyən kondisionerə aid prototip yaradıb. Bəs gəlin görək kompressorsuz və soyuducu maddəsiz işləyən bu kondisioner necə fəaliyyət göstərir?
Alimlərin yeni hazırladığı kondisioner prototipinin əsasını elektrokalorik effekti təşkil edir. Qeyd edək ki, bu termin elektrik sahəsinin təsiri ilə dielektrikin temperaturunun dəyişməsini ifadə edir. Yeni material ona elektrik cərəyanı verildikdə temperaturunun artması ilə özünü göstərir. Elektrik cərəyanın kəsilməsi isə bu materialın soyumasına gətirib çıxarır. Bu sistem ənənəvi buxar sıxılma sxemləri ilə müqayisədə daha rahat, qənaətcil və ekoloji cəhətdən təmizdir. Bellevaux şəhərindəki Lüksemburq Elm və Texnologiya İnstitutunun alimləri tərəfindən elektrokalorik soyutma qurğusunun prototipi yaradılmışdır.
Qeyd edək ki, bu qurğunun əsası soyutma və qızdırma dövrlərində parçalanmayan keramikaya bənzər materialdan hazırlanmış bir sıra plitələrdən ibarətdir. Təcrübələr zamanı bu qurğu sadəcə 4.2 vatt güclə 20.9 dərəcə temperatur fərqi təmin edib. Hətta bu qurğu sadəcə prototip olduğu üçün onu səmərəliliyi gələcəkdə daha da artırılacaq. Alimlər bu qurğunun müasir kompressorlu kondisionerləri əvəzləyəcəyinə inanır.
