Finlandiyanı Mərkəzi Avropa ilə birləşdirən yeganə sualtı rabitə kabeli qırılıb. Belə ki, hələlik C-Lion1 adı verilən bu kabelin qırılmasının səbəbi məlum deyil. Ümumiyyətlə, Finlandiya və Almaniya arasında uzanan bu sualtı rabitə kabeli xüsusilə Finlandiya üçün əhəmiyyət daşıyırdı.
Finlandiya hakimiyyəti hazırda, Baltik dənizində cənub-qərbdən Almaniyaya uzanan sualtı kabelin qopmasının səbəbini araşdırır. Dövlətə məxsus məlumat xidməti təminatçısı Cinia bazar ertəsi C-Lion1 kabelində nasazlığın aşkar edildiyini bildirib. Şirkətdən bildirilib ki, nasazlıq nəticəsində C-Lion1 sualtı kabelində işləyən rabitə əlaqələri kəsilib. Finlandiyanın YLE Yayım Korporasiyası, Finlandiyanın Milli Kibertəhlükəsizlik Mərkəzi Traficom-un kommunikasiya rəhbəri Samuli Bergström də Finlandiya və Almaniya arasında yer alan bu rabitə kabelinin qırıldığını təsdiqləyib.
Bergström, əlavə olaraq qeyd edib ki, “Səbəblər araşdırılır. Bəzən fasilələr meydana gələ bilir və bunun müxtəlif səbəbləri ola bilər. Məsələn, onlar hava şəraitinə və daşınma nəticəsində yaranan zədələrə həssasdırlar. Əhəmiyyətli olan problemlərin müəyyən edilməsi və bərpa tədbirlərinin görülməsidir”. Qeyd edək ki, C-Lion1 kabeli Almaniyanın Rostok limanından Finlandiyanın paytaxtı Helsinkiyə qədər təxminən 1200 kilometr uzanır. Cinia-nın məlumatına görə, 2016-cı ildə istifadəyə verilən kabel Skandinaviya ölkəsindən Mərkəzi Avropaya qədər uzanan yeganə sualtı rabitə kabelidir. Maraqlısı budur ki, 2023-cü ilin oktyabrında Finlandiya və Estoniya arasında Balticconnector təbii qaz boru kəməri zədələnmişdi və Finlandiya rəsmiləri qəsdən edilmiş bir hərəkət ola biləcəyini bildirmişdilər. Hazırda isə bu hadisə ilə bağlı heç bir açıqlama verilməyib.
