“Doppelgänger”, anlayışı “reallıqda” bir-birinə çox bənzəyən və hətta kənardan baxdıqda əkiz olduğunu düşünəcəyiniz insanlara deyilir. Bu insanlar çox oxşar görünsələr də heç bir qohumluğa sahib olmurlar. Lakin fiziki olaraq o qədər əkiz kimi görünürlər ki, üz tanıma sistemləri belə bu insanları çox vaxt ayıra bilmir. Tədqiqatçılar bu mövzunu ciddi formada araşdırmağa qərar verib və aşağıdakı şəkillərə baxdıqda oxşarlıqdan inanılmaz dərəcədə təəccüblənəcəyiniz insanlar üzərində testlər aparıblar. Nəticədə çox qəribə faktlar ortaya çıxıb. Fiziki cəhətdən bir-birinə oxşayan insanlar təkcə görünüşcə bənzər olmaqla qalmayıb, bənzər DNT daşıyırlar və hətta davranış, yaşayış tərzi cəhətdən də eynilik göstərirlər.
Tədqiqat 16 Doppelgänger cütlük üzərində aparılıb. Bu insanlar Microsoft Oxford Project Face API, MatConvNet alqoritmləri və Custom-Net xüsusi neyron mühərriki ilə analiz ediliblər. Fərdlər o qədər oxşardırlar ki, boy, ağırlıq, bədən quruluşları da demək olar eynidir. Bir-birinə oxşayan insanlar arasında 9 cütdə DNT analizləri 3.730 gendə təqribi 19.277 ortaq genetik versiyanın olduğunu göstərir.
Doppelgänger insanlar DNT analizləri ilə göstərdikləri ortaq genetik quruluşdan əlavə, eyni zamanda real həyatdakı davranışları, təhsil bacarıqları və vərdişləri cəhətdən də oxşarlıq göstəriblər. Alimlər qeyd edir ki, bu araşdırma nəticələri insanın genetik quruluşu ilə istər fiziki, istər xarakteristik xüsusiyyətləri cəhətdən əhəmiyyətli bir bağlantının olduğunu sübut edir.
Çünki, bu insanlar tamamilə fərqli ailələrdən, fərqli ölkələrdə yaşayan nəsillərdən gəlirlər. Lakin genetik olaraq mükəmməl oxşarlıq bu insanların bir nöqtədə kəsişməsinə gətirib çıxarır. Alimlərin fikrincə bu araşdırma təkamül prosesinə və tibdə yeni sahələrin qapısını açmaq üçün möhtəşəm başlanğıc olacaq.
Tədqiqatçılar Doppelgänger insanları tapmaq üçün 1999-cü ildən belə insanları axtaran və şəkillərini çəkən Francois Brunelle adlı fotoqrafdan kömək alıblar. Tədqiqatlardakı insanlar milliyyətinə görə Avropa, İspan, Şərqi Asiya və biri Mərkəzi-Cənubi Asiya əsilli olublar.
