Bu günlərdə texnologiya bazarında bir çox smartfon istehsalçısının şarj cihazlarını qutudan çıxardığının şahid oluruq. Bildiyiniz kimi, Apple iPhone 12 seriyası ilə qutudan şarj cihazlarını çıxarmağa başladı. Şirkət ətraf mühitə zərər verməmək üçün bu addımı həyata keçirdiyini bildirdi. Lakin bu hərəkət istifadəçilər tərəfindən çoxlu tənqidlərə məruz qaldı və hələ də mübahisəli məsələlərdən biri olaraq qalmağa davam edir. Tənqidlərə baxmayaraq bu siyasət smartfon dünyasında daha da yayılır. İndi isə Xiaomi Redmi seriyasının ötən gün təqdim edilmiş yeni bir modelində şarj cihazı yer almayıb.
Belə ki, Xiaomi bu yaxınlarda Hindistandakı istifadəçilərə Redmi Note 10S modelinin təkrar brendləşdirilmiş halı kimi görünən Redmi Note 11 SE modelini təqdim edib. Lakin şirkət ad dəyişikliyi ilə yanaşı, mübahisəli bir addım da atıb. Telefonun xüsusiyyətləri haqqında məlumatlar ortaya çıxıb və mübahisəli tendensiyada iştirak edən şirkətin saytındakı məlumata görə, smartfonun qutusundan şarj cihazı çıxmayacaq.
Xiaomi bu siyasətə Mİ 11 modeli ilə başlamışdı
Xatırladaq ki, Xiaomi smartfon ilə birlikdə şarj cihazı verməməyə Mi 11 modeli ilə başlamışdı. Lakin Xiaomi bunu Redmi seriyasında həyata keçirməmişdi. İndi isə işlərin dəyişdiyini görürük. Dünən Hindistanda təqdim edilən Redmi Note 11 SE modelinin qutusundan şarj cihazı çıxmayıb.
Rəsmi bir açıqlama verilmədiyinə görə bunun bir səfərlik olub-olmadığı məlum deyil. Smartfon qutusuna şarj cihazının qoyulmaması ətraf mühiti qorumaq üçün önəmli bir səbəb kimi göstərilsə də şirkətə maliyyə tərəfdən də müsbət təsir etdiyi aydın məsələdir. Qeyd edək ki, hələki şirkətin Hindistana satdığı digər modellərin qutularında şarj cihazı yer almağa davam edir.
Gələcəkdə də digər smartfon istehsalçılarının da yeni çıxacaq modellərində şarj alətinin yer almayacağını gözlənilir. Bəs siz bu barədə hansı fikirdəsiniz? Sizcə də digər smartfon istehsalçıları bu siyasəti həyata keçirəcəklər? Fikirlərinizi şərhlərdə bizimlə bölüşə bilərsiniz.
