Son dövrlərdə Çin və ABŞ arasında baş tutan texnologiya müharibəsi ən pik həddə çatıb. Belə ki, ABŞ-ın Çinin yarımkeçirici layihələndirilməsi və istehsalı imkanlarına tətbiq etdiyi yeni məhdudiyyətlərə cavab heç də gec gəlmədi. Beləliklə, Çin ABŞ üçün kritik əhəmiyyətə sahib mineralların ixracına qadağa qoyub. Qallium və germanium kimi minerallar artıq ABŞ üçün əlçatılmaz olur.
Bildiyimiz kimi, ABŞ tərəfindən irəli sürülən üçüncü ixrac məhdudiyyətləri əsasən Çinin qabaqcıl yarımkeçirici dizayn və istehsal etmək imkanlarını məhdudlaşdırmaq məqsədi daşıyırdı. Bu qərardan sonra Çin yüksək texnologiyalı məhsullar üçün həyati əhəmiyyət kəsb edən kritik mineralların ABŞ-a ixracını qadağan etdiyini açıqlayıb. Çin potensial hərbi tətbiqi olan qallium, germanium, stibium kimi mineralların ABŞ üçün ixracına qadağa qoyub.
Dərhal qüvvəyə minəcək qərarla “ikili istifadə” kimi təsnif edilən məhsullara (həm mülki, həm də hərbi təyinatlı məhsullar və ya materiallar) nəzarət də gücləndiriləcək. Çin Ticarət Nazirliyi bəyanatında bildirir ki, “Prinsipcə qalium, germanium, stibium və superbərk materialların ABŞ-a ixracına icazə verilməyəcək”. Əslində Çin, bu materialların ixracına keçən il də bəzi məhdudiyyətlər qoymuşdu. Yeni qərar isə bu məhdudiyyətləri gücləndirir. Çin gömrük məlumatlarına görə, bir il əvvəl bu minerallar üçün müvafiq olaraq dördüncü və beşinci ən böyük bazar olmasına baxmayaraq, bu ilin oktyabr ayına qədər Çindən ABŞ-a emal edilmiş və ya emal edilməmiş germanium və ya qalium ixracı olmayıb. Qallium və germanium yarımkeçiricilərdə istifadə edilərkən, germanium həmçinin infraqırmızı texnologiyada, fiber optik kabellərdə və günəş batareyalarında istifadə olunur.
