Azərbaycanda iqlim dəyişikliklər nəticəsində Qızılağac qoruğunda su hövzələrinin 40 %-i, bataqlıqların 52 %-i itirilib.
“Report” xəbər verir ki, bunu Rəqəmsal İnkişaf və Nəqliyyat Nazirliyi yanında Kosmik Agentliyin (“Azərkosmos”) İdarə Heyətinin sədri Saməddin Əsədov “İqlim dəyişikliyinə kosmosdan baxış” tədbirində deyib.
“1993-2023-cü illərdə Xəzərin səviyyəsi 2 metr azalıb. Bu azalmanın 1,5 metri son beş ilə təsadüf edib”,- deyə o qeyd edib.
S. Əsədov 2017-ci illə müqayisədə Böyük və Kiçik Qafqaz və Talış dağlarında olan buzlaqların 18-ni itirdiyimizi diqqətə çatdırıb.
“Ölkə üzrə quraqlıq səviyyəsinin qiymətləndirilməsi zamanı müəyyən olunub ki, Azərbaycan ərazisinin 15 %-i çox yüksək quraqlıq riski altındadır. Ən çox quraqlıq riskinə məruz qalan Gəncə, Daşkəsən və Dağlıq Şirvan regionlarıdır.”, – o vurğulayıb.
