Son dövrlərdə elektrikli avtomobil sənayesində vəziyyət gərginləşir. Belə ki, avtomobil nəhəngləri artıq elektrikli avtomobil seriyalarının sayını azaldaraq ənənəvi seriyalarına üstünlük verirlər. Xaricdə aparılan araşdırmaya görə, məşhur elektrikli Mercedes EQS modelləri cəmi bir il ərzində dəyərinin yarısını itirib. Ümumiyyətlə elektrikli avtomobil sahibi olmaq istəyənlər mütləq nəzərə almalıdır ki, avtomobillərinin dəyəri bir anda ciddi şəkildə azala bilər.
Qeyd edək ki, tez-tez ikinci əl qiymətləri dəyişən elektrikli modellər, batareya ömrü mövzusundakı narahatlıqlar və dəyişən sənaye şərtləri səbəbindən ciddi zərər görə bilir. Son dövrlərdə Mercedes EQS modelindən əlavə olaraq Nissan Leaf modeli də öz dəyərinin təxminən yarısını itirib. Daha əvvəl Mercedes EQS modeli dizaynı ilə gündəmə gəlmişdi. Əslində, EQS dizaynına nifrət edən böyük bir qrup insan var. Şirkətin yüksək effektivlik üçün bu şəkildə dizayn etdiyi EQS tez-tez brend və sinif ruhunu tam əks etdirmədiyinə görə tənqidlərə məruz qalır. Bu yaxınlarda açıqlama verən və bundan xəbərdar olduqlarını ifadə edən yüksək səviyyəli marka meneceri Christoph Starzynski verdiyi müsahibədə gələcək elektrikli avtomobillərinin daha estetik görünməsi üçün səy göstərəcəklərini bildirmişdi.
Hətta bu çərçivədə yeni Mercedes EQS modeli fərqli dizayn ilə təqdim ediləcək. Belə ki, burada bizi yeni S-Class modelinə bənzər struktur qarşılayacaq. Müvafiq olaraq, EQS SUV-dən olan 118 kVt batareya da bu avtomobilə yerləşdiriləcək. İyun ayında satışa çıxarılması gözlənilən yenilənmiş model, təxminən 800 km məsafə qət edə biləcək. Bu arada, Christoph Starzynskinin sözlərinə görə, Mercedes-Benz elektrik tərəfində istifadə etdiyi “EQ” etiketini uzun müddət davam etdirməyəcək. “EQ” brend olaraq qalacaq, lakin verilən məlumata görə, yeni nəsil avtomobillərdə EQE, EQS və EQC kimi adlar olmayacaq.
