Bu yaxınlarda sizlərə Zeekr 003 elektromobili haqqında məlumat vermişdik. Hansı ki, şirkətin 3-cü modeli olduğundan adının Zeekr 003 olacağı deyilirdi. Hətta şəkillərdə elektromobilin nömrə nişanı yerində bu adı da görmüşdük. Lakin bu elektromobil Zeekr X adı ilə nümayiş etdirildi. Beləliklə, Zeekr X elektromobilinin bu ilin sonunda Avropada başlayacaq EV satışları ilə şirkətin ilk qlobal elektrikli modeli olacağı rəsmi olaraq təsdiqləndi. Eyni zamanda dizaynı və bəzi texniki imkanları da məlum oldu.
Elektromobilin bazası Geely-ə məxsu SEA (Sustainable Experience Architecture) platformasına əsaslanır. Böyük bir ehtimalla Zeekr sahib olduğu platforma ilə 422 at gücü və 543 Nm fırlanma anı hasil edən Smart #1 Brabus modelində işlədilən ikili mühərrik qurğusundan istifadə edəcək. Qeyd edək ki, Smart brendi də Geely himayəsi altındadır. Maraqlıdır ki, eyni SEA platforması Volvo XC40 Recharge modelinin də əsasını təşkil edir. Bu detal bizə əsas verir ki, Zeekr X modelinin ən üst modifikasiyasında elektromobilə olduqca böyük 82 kVts həcmində batareya paketi quraşdırıla bilsin. Brend tərəfdinən bilidirilir ki, elektromobil nə qədər aqressiv və kobud üsluba malik olsa da 0-100 Km/s sürətlənməsi 4 saniyənin altında olacaq.
Giriş modeli 66 kVts həcmli batereya və arxa təkərləri gücləndirən tək mühərriklə təchiz ediləcək. Zeekr X elektromobilinin özü də çox gözəl dizayna sahibdir. Çərçivəsiz qapılar, gizli qapı tutacaqları və hələ saymadığımız bir çox futuristik elementlər elektromobildə diqqət çəkir. Çəkisi isə iki ton təşkil etməkdədir. A SUV kateqoriyasına aid bu elektromobil eyni zamanda 4.40 metr uzunluğa və 1.8 metr enə malikdir. Təkər oxları arası məsafə isə 2.7 metr təşkil edir. Əlavə detallar isə aprel ayında elektromobilin təqdimat mərasimi zamanı məlum olacaq. Məlumatlara görə modelin qiyməti 200.000 yuan təxminən 37 min Azərbacan manatı təşkil edəcək.
